Ihuriro rya AFC/M23, rirwanya ubutegetsi bwa Repubulika Iharanira Demokarasi ya Congo (RDC), ryatangaje ko Perezida Félix Tshisekedi nta burenganzira afite bwo gutangaza cyangwa gutegura ifungurwa ry’ikibuga cy’indege cya Goma, kuko kiri mu gace bavuga ko kabohowe n’ingabo zabo.
Ibi byavuzwe na Lawrence Kanyuka, Umuvugizi wa AFC/M23, nyuma y’aho Inama y’Abaminisitiri ya RDC yo ku wa 14 Ugushyingo 2025 isabye abaminisitiri batatu gutegura ibikorwa by’ifungurwa ry’iki kibuga cy’indege. Abo barimo Minisitiri w’Umutekano Jacquemain Shabani Lukoo, Minisitiri w’Ubwikorezi Jean-Pierre Bemba, n’uw’Ingabo Guy Kabombo Muadiamvita.
Kanyuka yavuze ko Leta ya Kinshasa idasanzwe ifite uburenganzira bwo gutekereza ku kibuga kiri ahantu ngo AFC/M23 yigaruriye, ikagisukura nyuma y’uko cyasenywe.
Ifungurwa ry’iki kibuga ryatangiye kuganirwaho mu nama mpuzamahanga ku mutekano wo mu Karere k’Ibiyaga bigari yabereye mu Bufaransa ku wa 30 Ukwakira 2025. Aho ni ho Minisitiri w’Ububanyi n’amahanga w’u Bufaransa, Jean-Noël Barrot, yatangaje ko iki kibazo kizaganirwaho mu mishyikirano iri kubera i Doha muri Qatar hagati ya Leta ya RDC na AFC/M23.
Nubwo Leta ya Congo ivuga ko ifite ububasha bwose ku bikorwa remezo byose by’igihugu, Perezida Tshisekedi yaherutse gutangaza ko iki kibuga kizafungurwa mbere y’uko umwaka wa 2025 urangira, ariko AFC/M23 ikomeza kugaragaza ko ari yo yonyine ibifitiye ububasha mu gace gacumbikiwe.
