Amakuru yakomeje gukwirakwizwa ku mbugankoranyambaga yemeza ko Igisirikare cya Leta ya Repubulika ya Demokarasi ya Congo, FARDC cyarashe cyifashishije indege n’ibibunda biremereye ikiraro cya Mpety (Mpeti) gisanzwe gifasha abaturage ba Walikale guhahirana.
Bamwe mu bashyigikiye ubutegetsi bwa Kinshasa banditse ko mu gihe inyeshyamba za M23 zari zimaze iminsi mu mirimo yo gusana ikiraro cya Mpety giherereye muri Walikale, FARDC yagisenye, bikaba byanemejwe na Bertrand Bisiimwa usanzwe ari umuyobozi wungirije muri AFC/M23.
Mu butumwa yanyujije ku rukuta rwa X, Bertrand Bisiimwa yavuze ko ihuriro ry’ingabo za Kinshasa zarashe iki kiraro cyoroherezaga urujya n’uruza rw’abaturage muri kariya gace ka DR Congo, avuga ko gusenya burundu iki kiraro bibangamira cyane urujya n’uruza rw’abantu n’ibicuruzwa muri Teritwari ya Walikale.
Yagize ati: “Kuri iki cyumweru tariki 28 Nzeri 2025 mu gitondo, ingabo zirwanira mu kirere n’imbunda nini z’ihuriro ry’ingabo z’ubutegetsi bwa Kinshasa zagabye igitero gikomeye zisenya burundu ikiraro cya Mpeti. Gusenya burundu iki kiraro bibangamira cyane urujya n’uruza rw’abantu n’ibicuruzwa muri Walikale.”
Sosiyete sivile yo muri Teritwari ya Walikale n’abayobozi b’inzego z’ibanze bari bamaze iminsi batanga ubutumwa bwo kuburira (alertes) aho bemezaga ko M23 ikomeje kongera imbaraga mu basirikare n’ibikoresho biremereye ikoresha iki kiraro igamije gukomeza ibitero ishaka kwigarurira agace ka Pinga.
Ku wa gatatu, umwe mu bayobozi ba Walikale yagize ati: “Barimo kuvugurura ikiraro cya Mpeti kugira ngo boroherwe no gutwara intwaro ziremereye. Bashyizeho sisiteme icunga ikirere kugira ngo bahangane z’indege z’igisirikare cyacu, FARDC ndetse na drones.”
