Ubushinjacyaha bwasabiye Nyampinga w’u Rwanda (Miss 2022), Muheto Divine gufungwa umwaka umwe n’amezi umunani ku byaha byo gutwara imodoka yanyoye ibisindisha birengeje igipimo, kugonga ibikorwa remezo no guhunga aho yabikoreye.
Muheto Divine w’imyaka 21 yazanywe mu rukiko mu gitondo kare kuri uyu wa kane, amasaha macye mbere y’uko iburanisha ritangira.
Icyumba gito cy’Urukiko rw’ibanze rwa Kicukiro cyari cyuzuyemo abanyamakuru benshi n’abantu baboneka nk’inshuti ze n’abo mu muryango we.
Amaze gusomerwa ibyaha aregwa, Muheto Divine wari wunganiwe n’abanyamategeko batatu, yavuze ko yemera icyaha cyo gutwara imodoka yanyoye no kugonga.
Mu ijwi rito, ryumvikana nk’iririmo ubwoba, yagize ati: “Ariko sinemera ko nahunze kuko imodoka nayirekeye aho. Nagize ubwoba kuko abantu bahuruye ari benshi ntinya ko bangirira nabi. Police ihageze nagarutse ubwanjye”.
Ubushinjacyaha bwavuze ko ibyaha aregwa bikwiye gutuma afungwa. Ubushinjacyaha bwavuze ko Muheto Divine yari yanyoye ibisindisha kugeza ku gipimo cya 4 kandi igipimo kihanganirwa ari 0.8.
Mu rukiko byatangajwe ko Muheto yatawe muri yombi ku cyumweru tariki 20 Ukwakira 2024, gusa Polisi y’Igihugu yo yatangaje aya makuru ku wa kabiri 29 Ukwakira 2024, ivuga ko afunze.
Abunganira Muheto Divine bavuze ko batabona impamvu umukiliya wabo yafunzwe iki gihe cyose kandi akagezwa mu rukiko, ko babona bisa no kumutandukanya n’abandi bantu bakora icyaha nk’icye bagacibwa amande bagafungwa iminsi itanu, bakarekurwa.
Aba bunganizi be basabye ko Muheto arekurwa agacibwa amande kuko asaba imbabazi kandi akemera bimwe mu byo aregwa.
Muheto na we yagize ati: “Iminsi 11 maze mfunze narize ntabwo icyaha nk’iki nzagisubira.”
Umucamanza yavuze ko nyuma yo kumva impande zombi tariki 06 Ugushyingo 2024 ari bwo Urukiko ruzasoma umwanzuro ku ifunga n’ifungura ry’agateganyo. Muheto arakomeza kuba afunzwe na polisi by’agateganyo.
Muheto Divine yamenyekanye mu 2022 ubwo yatsindaga abandi bakobwa mu irushanwa rya Miss Rwanda, mbere y’uko Leta irihagarika kubera ibyaha by’ihohotera rishingiye ku gitsina byashinjwe abariteguraga. (BBC)
