Muri Repubulika Iharanira Demokarasi ya Kongo, ubwato bwari buturutse muri lokalite ya Minova mu teritware ya Kalehe mu ntara ya Kivu ya ruguru bwarohamiye hafi n’icyambu cya Kituku mu mujyi wa Goma.
Ishyami rya leta rishinzwe ibyerekeye ubwikorezi ryemeza ko bwari butwaye abagenzi bagera kuri 400, umubare munini kugeza ubu ukaba utaraboneka.
Ubu bwato kandi bwari bwikoreye imyaka irimo ibitoki, ibirayi n’ibishyimbo nkuko byemezwa n’iyo serivisi.Ibi byabaye mu masaha ya saa tanu n’igice.
Ibikorwa by’ubucuruzi bisanzwe bikorerwa kuri iki cyambu byose kugeza ubu byahagaze kuko abatabazi barimo gushakisha imibiri y’abarohamiye muri ubu bwato.
Abavuganye n’ijwi ry’Amerika bari kuri iki cyambu bemeza ko impamvu yatumye ubwato burohama ari ukubera ko bwari bwikorereye abantu benshi barusha ubushobozi bwabwo bikaba byateye iyo mpanuka.
Abaturage barasaba ko umuhanda uva Goma ujya mu teritware ya Kalehe wafungurwa bityo abantu bagatangira kuwukoresha aho gukoresha amato mu ngendo zabo za buri munsi.
Umuhanda wari usanzwe uhuza intara zombi ntugikoreshwa kubera ko ubu wafashwe n’abarwanyi b’umutwe wa M23 bikaba bigora abari basanzwe bawukoresha kuwunyuramo.
