Urujijo ku busambanyi buvugwa mu bakozi n’abanyeshuri ba TTC Matimba.

Mu ishuri nderabarezi (Teacher Training College-TTC) rya Matimba riherereye mu Murenge wa Matimba, Akarere ka Nyagatare, Intara y’Iburasirazuba haravugwa ubusambanyi hagati y’umuyobozi w’ikigo n’abakozi ndetse no hagati y’abarimu n’abanyeshuri, buri ruhande ariko rukaba rushinja urundi kurubeahyera.

Mu gisa nk’urujijo, umuyobozi wa TTC Matimba avugwaho gushaka gusambanya abana, ngo no kuri ubu akaba yarirukanye umuforomokazi w’ikigo ngo amuziza kumwima igitsina ngo baryamane igishobora gufatwa nka ruswa y’igitsina.

Inkuru ya BTN ivuga ko bamwe mu barimu b’abagore bashinja umuyobozi w’ikigo kubakorera ihohoterwa rishingiye ku gitsina aho ngo uwanze kuryamana nawe ahita yirukanwa.

Umwe mu batanze amakuru yavuze ko ngo umuyobozi (Director) yafashwe ari gusambanya umukozi ukora mu bijyanye n’amafaranga (cashier), maze ngo mu kwikura mu kimwaro ahita atangiza umukwabu wo gushaka abashyize hanze amakuru aho hafashwe abarimu bane.

Uyu muyobozi w’ikigo, Murwanyi Isaie we avuga ko bamubeshyera, ahubwo ngo abasambanya abana ni bamwe mu barimu bahigisha ngo n’ubwo nta bimenyetso bifatika.

Akomeza avuga ko akimenya ko hari abarimu basambanya abana, yashatse kujyana dosiye muri RIB ariko ngo abura ibimenyetso, gusa ngo yarabahamagaye bagirana ikiganiro arabihanangiriza.

Avuga ko ariko ku rundi ruhande bashobora kuba banabeshyerwa nkuko nawe abeshyerwa, aho ngo n’amajwi yagiye hanze avuga ko ari aye atereta uwo mu kashiya (cashier) ari amahimbano. Ati: “Barayahimbye rwose. Uwabikoze yakoresheje ikoranabuhanga kuko yigeze no kwambika umuntu inzoka, abeshya ko ajya mu bapfumu”.

Abajijwe icyaba gitera abarimu kumubeshyera, yavuze ko imvano yabyo ari abarimu bimuwe n’Akarere kuko ikigo cyari gifite benshi maze ngo bararakara bashaka kumwihimuraho kandi mu by’ukuri atari we wabimuye (mutation).

Umuyobozi w’Akarere ka Nyagatare iki kigo giherereyemo, Gasana Stephen yavuze ko ibyo atabizi ndetse ko ibivugwa bitashoboka, avuga ko akeneye umwanya uhagije ngo abikurikirane neza.

Mayor Stephen yavuze ko TTC Matimba ari ikigo cyigisha neza, abana bakaba bahabwa amafunguro uko bikwiriye ngo bityo ibivugwa bikaba biteye urujijo.

Hari andi makuru ariko avuga ko aba barimu bagiye bamenyesha Akarere ko bahozwa ku nkeke n’uyu muyobozi w’ikigo gusa ngo Akarere kakabirenza ingohe nk’aho nta cyabaye.