Hirya no hino mu gihugu usanga hari ibikorwa by’ubukungu bifasha abaturage kwiteza imbere. Mu karere ka Gakenke ho ubuhinzi bw’ibigori ni kimwe mu bikorwa biza imbere mu kuzahura ubukungu bwabo maze bagakirigita ifaranga, ibibafasha kwiteza imbere mu kugira aho gutura heza, kwishyura ubwisungane mu kwivuza ndetse no kurihira abana amashuri.
Ubuhinzi bw’ibigori muri aka karere k’imisozi miremire bwamaze gutera imbere ku buryo mu bihingwa abahinzi bishimira mu kubinjiriza amafaranga menshi ibigori birimo. Impamvu ngo ni uko kuri ubu ibigori bihingirwa isoko, amafaranga avuyemo akabunganira mu kujyana abana ku ishuri, gutura heza no kwiteza imbere mu buryo buri wese yihitiyemo.
Bamwe mu baturage mu mirenge itandukanye bahinga ahari amasite (sites) yahujweho ubutaka, bahamya ko nta ko kuba barahisemo igihingwa cy’ibigori ntako bisa kuko ngo byabafashije kwikura mu bukene kuri ubu nabo bakaba bakirigita ifaranga kandi mbere byarafatwaga nka kirazira bitewe n’imiterere karemano y’Akarere kabo ka Gakenke kagizwe n’ubutaka ahanini busharira.
Aba bahinzi bo mu karere ka Gakenke kugeza ubu bahinga ku butaka buhujwe buri kuri site (Sites) 478, aho ibigori bihingwa kuri Hegitari 15,900 kandi abahinzi bagera kuri 98% bakaba bakoresha inyongeramusaruro mu buhinzi bw’ibigori ngo ari nayo mpamvu usanga babona umusaruro ufatika.
Twashatse kumenya ibanga ryakoreshejwe, twegera umuyobozi w’Akarere ka Gakenke, madamu Mukandayisenga Vestine, aduhishurira ko byose byavuye mu gukorera hamwe. Ati: “Hashyizwe imbaraga mu bukangurambaga, abahinzi berekwa inyungu ziri mu mikoreshereze y’ubutaka buhujweho ibihingwa byatoranijwe, basobanurirwa akamaro n’inyungu iri mu gukoresha inyongeramusaruro. Ibi byashobotse kandi kubera abahinzi bakunda umurimo kandi bakumva vuba inama bagiriwe”.
Ku kijyanye n’icyo Akarere gakomeza gukora kugirango umusaruro ukomeze kuboneka ku bwinshi no mu bwiza, Meya Vestine ati: “Turakomeza kuba hafi y’abahinzi mu gukomeza kubagezaho ikoranabuhanga (technologies) nshya mu buhinzi tubasaba kudasubira inyuma kuko ubuhinzi bukozwe neza butunga ubukora”.
Akarere ka Gakenke gafite muri rusange site 478 zirimo: Site ya Mukinga, Site ya Murandi, Site ya Kagoma , Site ya Nyarutovu muri Mugunga na Cyarubayi na Rusasa. Umwaka wa 2024 ukaba warasize, hahinzwe Hegitare 15,900 z’ibigori, haboneka kandi umusaruro ugera kuri toni 28,620, aho buri rugo nibura rwejeje imifuka hafi itatu (300Kg) y’ibigori.
Gakenke ni kamwe mu turere dutanu tugize Intara y’Amajyaruguru, abaturage bako bakaba batunzwe n’ubuhinzi n’ubworozi ndetse n’ibindi bikorwa bibinjiriza amafaranga abafasha kwiteza imbere. Mu bihingwa bikunze kwera muri aka karerehaimo: ibishyimbo, urutoki, ibigori, ibijumba, ikawa ndetse n’ibindi.
