Byasabye iminota y’inyongera kugira ngo u Butaliyani bubashe gutsinda Autriche ibitego 2-1 mu mikino ya kimwe cy’umunani mu irushanwa rihuza amakipe y’ibihugu ku mugabane w’u Burayi (EURO 2020). Ibi byatumye u Butaliyani bwesa agahigo n’ubundi bwari bwarashyizeho muri 1930 ko kumara imikino 30 budatsinzwe, bunakatisha itike yo gukina imikino ya kimwe cya kane cy’iri rushanwa.
Mu mukino wakinnye hitabajwe iminota 30 y’inyongera kuko 90 isanzwe y’umukino yarangiye nta kipe ibashije kureba mu izamu ry’indi. Abataliyani nibo bafunguye amazamu bwa mbere ku munota wa 95 ku ishoti riremereye ryatewe na Federico Chiesa wari winjiye asimbuye maze akoresha ukuguru kw’ibumoso aboneza mu nguni y’ibumoso y’izamu rya Autriche. Ku munota wa 105, Matteo Pessina nawe wari winjiye asimbuye yaboneje umupira mu yindi nguni y’izamu rya Autriche, biba bibaye ibitego 2-0
Ishyaka no kwitanga by’abakinnyi ba Autriche nibyo byatumye Sasa Kalajdzic abasha kwinjiza igitego cy’umutwe ku mupira wari uvuye muri koroneri, nubwo ibi bisa nkaho ntacyo byatanze kuko iyi kipe yahise isezererwa.
Iyi nsinzi Abataliyani bakuye kuri sitade ya Wembley yo mu Bwongereza kuri uyu wa Gatandatu tariki ya 26 Kamena isobanuye ko bamaze gutsinda imikino 12 bikurikiranya. Ni umukino kandi wa 31 bamaze bataratsindwa. Ibi byatumye bakuraho agahigo n’ubundi bari barashyizeho hagati ya 1935 na 1939 ubwo batozwaga na Vittorio Pozzo.
Ku nshuro ya gatatu Autriche yitabiriye iri rushanwa, ni ubwa mbere yari ibashije kurenga amatsinda.
Mu mikino ya kimwe cya Kane, ikipe y’Abataliyani izwi ku izina rya Azzura izahura n’izarokoka hagati y’u Bubiliggi na Portugal.
Mu wundi mukino wa kimwe cy’umunani wabaye kuri uyu wa Gatandatu Danmark yatsinze Wales 4-0. Mu mikino iteganijwe kuri iki cyumweru, Ubuholandi burakina na Repubulika ya Czech (18:00’) naho Ububiligi buri buze kwisobanura na Portugal (21:00’).
