Umudepite uhagarariye agace ka Butembo mu Nteko Ishinga amategeko y’Intara ya Kivu y’Amajyaruguru, Crispin Mbindule, yasabye imitwe yose y’inyeshyamba izwi nka Mai Mai kwishyira hamwe maze bakihuza na FARDC kugirango barwanye M23, kuko ngo ikibazo cya M23 n’umutekano mucye mu Burasirazuba bwa Repubulika ya Demokarasi ya Congo kizakemurwa n’abakongomani ubwabo ndetse anagereranya M23 nk’umutwe w’abanyamahanga, abakongomani bose bakwiye guhagurukira bashyize hamwe bakawurwanya.
Mu mvugo ikakaye ati :”Twifuza ko ejo hazaza tugomba kuba ari twe dufite igisirikare cya mbere muri Afurika. Dukeneye urubyiruko mu gisirikare. Njye ntabwo najya mu ngabo kuko imyaka yansize ariko iyo nza kuba nkiri umusore mba nahise njya mu ngabo z’Igihugu, FARDC kugirango nkirwanirire. Ntekereza ko ikibazo cya M23 n’umutekano mucye kizakemurwa n’abakongomani ubwabo. Aba Mai Mai ni abakongomani. Ni imitwe y’abakongomani ubwabo. Niba Igihugu gitewe n’abanyamahanga nka M23 namwe mu gakomeza gutoteza abaturage gusa, ndababwiza ukuri ko namwe mwaba mutari abakongomani. Ndasaba rero Mai Mai kwifatanya na FARDC mu gihe urugo rwacu arirwo rwanyu rwatewe kugirango rudashya. Mukurikize uburyo bwo kwihuza na FARDC bwashyizweho maze mujye gufasha FARDC guhangana nabo banyamahanga ba M23”.
N’ubwo uyu mudepite avuga ibi ariko, bizwi neza ko Umutwe wa M23 ari umutwe w’abakongomani bavuga ururimi rw’Ikinyarwanda ariko abanyapolitiki benshi muri DR Congo bakaba badakunze kubemera nk’abenegihugu babo, bakavuga ko ari abanyarwanda baje kuvogera Igihugu cyabo, iyi ikaba n’imwe mu mpamvu M23 yatangaje ivuga ko mu byo irwanira harimo guharanira uburenganzira bw’abakongomani bavuga ururimi rw’Ikinyarwanda badahabwa agaciro ndetse ntibafatwe nk’abandi bakongomani ahubwo bagafatwa nk’abanyamahanga kandi muri DR Congo ariho hari gakondo yabo.
Ibi bisabwe aba Mai Mai, mu gihe Umutwe w’iterabwoba FDLR wasabye Leta ya DR Congo ko yagira uruhare mu rugamba rwo kurwanya M23 yanga urunuka ivuga ko ugizwe n’abatutsi bafashwa n’u Rwanda bityo ko ugamije kubarimbura(FDLR) burundu. Itangazo ry’Umutwe wa FDLR ryo kuwa 20 Nyakanga 2022, ryashyizweho umukono n’Umuvugizi wayo Maj Cure Ngoma, rivuga ko FDLR itewe impungenge ndetse ko yamaze kubona ko Umuryango w’Ibihugu by’Uburasirazuba bwa Afurika EAC, urimo gutinza gahunda yo kohereza umutwe w’ingabo uhuriweho n’Ibihugu bigize uyu Muryango mu rwego rwo gurwanya M23 n’indi mitwe y’inyeshyamba yitwaje intwaro mu Burasirazuba bwa Repubulika ya Demokarasi ya Congo.
