Guverinoma y’u Buyapani yatangaje ko yafashe icyemezo cy’uko mu myaka ibiri iri imbere izatangira kurekurira mu nyanja amazi atarakunze kuvugwaho rumwe kubera ingaruka yagira ku bantu n’ibidukikije amaze igihe abitse muri Fukushima Daiichi Nuclear Power Plant.
U Buyapani bufashe uyu mwanzuro nyuma y’igihe kinini imiryango ishinzwe kurengera ibidukikije n’ibihugu bitandukanye biwurwanya kubera impungenge z’uko mu gihe aya mazi yaba arekuwe yagira ingaruka ku mafi n’abantu.
Mu 2011 nibwo habayeho iyangirika ry’uruganda rutunganya ingufu za nucléaire rizwi nka ‘Fukushima Daiichi power plant disaster’ bitewe n’umutingito wibasiwe u Buyapani.
Uku kwangirika kwatumye uru ruganda rutakaza ubushobozi bwo gukonjesha ibyuma birukoreshwamo hatangira kwifashishwa amazi, muri iki gihe cyose aya mazi yagiye abikwa mu bigega byabugenewe, gusa mu myaka ishize u Buyapani bwatangiye kugaragaza ko ntaho bugifite ho kuyabika.
Kuri uyu wa 13 Mata, Guverinoma y’u Buyapani yatangaje ko mu myaka ibiri aya mazi azatangira kugenda arekurwa, bikazafata imyaka 10 kugira ngo yose arekurwe. U Buyabani bwijeje ko aya mazi azayungururwa kugira ngo ibinyabutabire byose biyarimo bishobora kugira ingaruka ku bidukikije bikurwemo.
Minisitiri w’Intebe w’u Buyapani, Yoshihide Suga, yavuze ko hafashwe uyu mwanzuro kuko nta kindi gisubizo gihari. Ati “Bigamije guhagarika uru ruganda ndetse no gusana Fukushima.”
Nyuma yo gutangaza iki cyemezo ibihugu nk’u Bushinwa na Koreya y’Epfo byagaragaje ko bitabyishimiye
Kugeza ubu uru ruganda rubitse amazi angana na toni miliyoni 1,23 yagaragajwe nk’ashobora kugira ingaruka zitandukanye zirimo no gutuma ADN y’umuntu ihinduka bitewe n’ibinyabutabire bya carbon-14 na tritium biyarimo.
IGIHE
