Perezida wa Leta Zunze Ubumwe za Amerika, Donald Trump, yashimye cyane ubumwe n’ubwenge yasanze ku bakuru b’ibihugu by’u Rwanda na Repubulika Iharanira Demokarasi ya Congo, Paul Kagame na Félix Tshisekedi, avuga ko ikiganiro bagiranye cyamweretse ko bakundana kandi bafite ubushishozi buhanitse.
Ibi yabigarutseho kuri uyu wa Kane mu muhango ukomeye wo gushyira umukono ku masezerano y’amahoro hagati y’u Rwanda na RDC, wabereye muri US Institute of Peace, yahinduriwe izina ku nshuro idasanzwe ikitwa Donald Trump Institute of Peace, mu rwego rwo kwerekana agaciro byahawe.
Uyu muhango witabiriwe n’abakuru b’ibihugu barimo Paul Kagame w’u Rwanda, Félix Tshisekedi wa Congo, João Lourenço wa Angola, Evariste Ndayishimiye w’u Burundi, William Ruto wa Kenya ndetse na Visi Perezida wa Uganda, Jessica Alupo.
Mu ijambo rye ryuzuye amarangamutima, Perezida Trump yavuze ko isinywa ry’aya masezerano ari intambwe ikomeye izarangiza ibibazo by’umutekano muke bimaze imyaka irenga 30 mu karere.
Yongeyeho ko ikiganiro yagiranye na Perezida Kagame na Tshisekedi mbere y’umuhango cyamweretse ubushake bukomeye bafite bwo kuzana amahoro arambye.
Ayo masezerano yitezweho byinshi birimo guhagarika imirwano, gukura intwaro mu maboko y’inyeshyamba, gucyura impunzi, no kuryoza abakoze ibyaha bikomeye.
Trump yavuze ko ari intangiriro y’igihe gishya cy’ubufatanye, ubudaheranwa n’amahoro arambye mu karere k’Ibiyaga bihari.
Uru rugendo rw’amasezerano ntirugamije gusa guhosha intambara, ahubwo ni intambwe iganisha ku kongera kwiyubaka kw’ibihugu byombi no gushyira imbere inyungu z’abaturage kurusha iz’abanyepolitiki.
Kuba Trump yarahisemo gutanga urubuga rwo kwakira uyu muhango, ndetse agashyira izina rye kuri US Institute of Peace, byagaragaje ko Leta Zunze Ubumwe za Amerika zifuza kugira uruhare rukomeye mu kugarura ituze mu karere.
