Ubuyobozi bushya bw’urugaga rw’abikorera (PSF) mu Karere ka Musanze bwiyemeje gushyira imbaraga mu guteza imbere ubucuruzi n’ishoramari, by’umwihariko bushyigikira urubyiruko mu kwihangira imirimo no kubona amahirwe arufasha kwiteza imbere.
Byagarutsweho mu matora yabaye kuri uyu wa Mbere tariki ya 09 Werurwe 2026, mu cyumba cy’inama cy’Akarere ka Musanze, yitabirwa n’abanyamuryango b’urugaga rw’abikorera baturutse mu nzego zitandukanye z’ubucuruzi n’ishoramari bakorera muri aka Karere. Ni igikorwa cyayobowe n’Umuyobozi w’Akarere ka Musanze wungirije ushinzwe iterambere ry’ubukungu, Uwanyirigira Clarisse, wari uhagarariye ubuyobozi bw’Akarere muri aya matora yari agamije gushyiraho ubuyobozi bushya buzayobora uru rugaga mu gihe cy’imyaka itatu iri imbere.
Muri aya matora, Bwana Habiyambere John ni we wongeye gutorerwa kuyobora urugaga rw’abikorera mu Karere ka Musanze, agaragarizwa icyizere n’abanyamuryango bamuhisemo ngo akomeze kubahagararira no guteza imbere ibikorwa byabo. Azaba yungirijwe na Simba Safari ndetse na Twizeyimana Dorothy bazamufasha mu nshingano zo gukomeza guteza imbere ubufatanye hagati y’abikorera n’inzego za Leta.
Mu ijambo yagejeje ku bitabiriye iki gikorwa, Umuyobozi w’Akarere wungirije ushinzwe Iterambere ry’ubukungu, Uwanyirigira Clarisse, yashimiye cyane komite icyuye igihe ku ruhare rugaragara yagize mu guteza imbere ubukungu bw’Akarere ka Musanze. Yagaragaje ko abikorera bagize uruhare rukomeye mu guhanga imirimo no kugabanya ubushomeri mu baturage, by’umwihariko mu rubyiruko rukeneye amahirwe yo kwiteza imbere.
Yagize ati: “Nk’Akarere turashimira cyane komite icyuye igihe ku bw’imbaraga yashyize mu guteza imbere ubukungu bwacu, cyane cyane mu guhanga imirimo yafashije urubyiruko kubona akazi no kwigira.”
Yakomeje asaba komite nshya gutangira inshingano zayo ishyize imbere ubufatanye n’inzego za Leta kugira ngo bafatanye kugera ku ntego z’iterambere igihugu cyihaye. Yagaragaje ko mu bikorwa byinshi Akarere gashyira imbere, ubufatanye n’abikorera ari ingenzi kuko ari bo bagira uruhare runini mu ishoramari no mu guhanga imirimo.
Yagize ati: “Hari ibikorwa byinshi tuba dukeneye gufatanyamo n’abikorera birimo kubaka ibikorwaremezo, kurwanya ubushomeri mu rubyiruko no guteza imbere udushya mu bucuruzi n’inganda. Ibi byose ntibyagerwaho n’Akarere konyine, bisaba ubufatanye n’imbaraga z’abikorera.”
Yanagarutse ku kamaro ko gukomeza gufatanya mu gushyira mu bikorwa gahunda y’igihugu yo kwihutisha iterambere izwi nka NST2, asaba ko abikorera bagira uruhare rufatika mu gutanga ibisubizo ku bibazo byugarije ubukungu bw’akarere, cyane cyane ibijyanye no guhanga imirimo no guteza imbere imishinga ifite agaciro ku baturage.
Nyuma yo gutorerwa kongera kuyobora urugaga rw’abikorera mu Karere ka Musanze, Perezida mushya Habiyambere John yashimiye abanyamuryango bongeye kumugirira icyizere bakamuhitamo ngo akomeze kubahagararira mu gihe cy’imyaka itatu iri imbere. Yavuze ko iki cyizere ari inshingano zikomeye zimusaba gukorana imbaraga n’abandi bagize komite kugira ngo bakomeze guteza imbere ubucuruzi n’ishoramari muri aka Karere.
Yagize ati: “Ndashimira cyane abanyamuryango bongeye kungirira icyizere bakampitamo ngo nongere mbahagararire. Ibi bituma turushaho kongera imbaraga mu guharanira icyatuma umujyi wa Musanze urushaho gutera imbere.”
Habiyambere yavuze ko mu myaka iri imbere bazakomeza gushyira imbaraga mu gufasha urubyiruko kubona amahirwe yo kwikorera no kwihangira imirimo, cyane cyane binyuze mu kubafasha kubona inguzanyo no kubaha ubumenyi bubafasha gutangira no guteza imbere imishinga yabo.
Yagize ati: “Isi irahinduka kandi natwe tugomba kujyana n’igihe. Tuzashyira imbaraga mu gukora ubuvugizi mu ma banki kugira ngo urubyiruko rubone inguzanyo zibafasha gutangira imishinga yabo. Tuzanakorana n’ibigo bitanga amahugurwa kugira ngo abafite inzozi zo kwikorera bahabwe ubumenyi bubafasha kwirinda ibihombo biterwa no kutagira ubunararibonye mu bucuruzi.”
Yakomeje ashimangira ko komite nshya izashyira imbere gahunda ziteza imbere imibereho y’urubyiruko ndetse no gushyigikira ibikorwa by’ubucuruzi n’ishoramari bigira uruhare mu kuzamura ubukungu bw’Akarere ka Musanze.
Yongeyeho ko abikorera bafite uruhare rukomeye mu gushyira mu bikorwa icyerekezo cya Guverinoma y’u Rwanda cyo guteza imbere ubukungu bushingiye ku guhanga udushya, gushora imari no guteza imbere imishinga itanga akazi ku baturage.
Aya matora agaragaza ubushake bw’abikorera bwo gukomeza gufatanya n’inzego za Leta mu guteza imbere ubukungu bw’Akarere ka Musanze, cyane cyane mu rwego rwo guhanga imirimo mishya, guteza imbere ubucuruzi no guteza imbere imibereho myiza y’abaturage muri rusange.
Ubuyobozi bushya bwa PSF bwatowe mu karere ka Musanze bwitezweho gukomeza guharanira iterambere ry’abikorera no kongera imbaraga mu guteza imbere umujyi wa Musanze nk’ahantu hakomeye mu bukerarugendo, ubucuruzi n’ishoramari mu majyaruguru y’u Rwanda.
