Komisiyo ishinzwe amatora muri Guinée-Conakry yatangaje ko Gen Doumbouya uyobora iki gihugu kuva mu 2021 yatsinze amatora y’Umukuru w’Igihugu ku majwi 86,72%.
Aya matora yabaye tariki ya 28 Ukuboza 2025. Gen Doumbouya yahatanye n’abandi bakandida umunani barimo abahoze muri Guverinoma n’abatavuga rumwe n’ubutegetsi bwe.
Uwamukurikiye ni Yéro Baldé wo mu ishyaka FRONDEG (Front démocratique de Guinée). Komisiyo y’amatora yagaragaje ko we yagize amajwi 6,51%.
Perezida wa Komisiyo y’amatora, Djanabou Toure, ku wa 30 Ukuboza yatangaje ko muri rusange, abantu 80,95% muri miliyoni 6,7 bari kuri lisiti y’itora ari bo bitabiriye aya matora.
Ibyavuye mu matora byatangajwe na Komisiyo y’amatora biracyafatwa nk’iby’agateganyo mu gihe Urukiko rw’Ikirenga rwa Guinée-Conakry rutarabyemeza. Mu minsi itarenze umunani ni bwo umusaruro udasubirwaho uzemezwa.
Gen Doumbouya yakuye Alpha Condé ku butegetsi muri Nzeri 2021, ahita amusimbura. Icyo gihe, yabwiye abaturage ko yaba we cyangwa abandi basirikare bamufasha kuyobora igihugu, bataziyamamariza umwanya w’Umukuru w’Igihugu.
Muri Nzeri 2025, muri Guinée-Conakry habaye amatora ya kamarampaka, abaturage hafi 89% banzura ko Itegeko Nshinga rivugururwa, Gen Doumbouya akemererwa kwiyamamariza umwanya w’Umukuru w’Igihugu.
Ubusanzwe, manda ya Perezida wa Guinée-Conakry yamaraga imyaka itanu, ariko Itegeko Nshinga rishya ryayigejeje ku myaka irindwi.
