Inyeshyamba z’Umutwe wa M23 ziravuga ko ibirindiro byazo mu gace ka Jomba muri Teritwari ya Rutshuru birimo kuraswaho n’ingabo za Leta, FARDC, kuva mu gitondo cya kare kuri uyu wa mbere tariki 06 Kamena 2022.
Hari hashize icyumweru imirwano ihagaze nyuma y’uko izi nyeshyamba za M23 zitangaje ko zivuye mu duce zari zarafashe muri Teritwari za Rutshuru na Nyiragongo z’Intara ya Kivu ya Ruguru.
Umuvigizi wa M23, Major Willy Ngoma, yabwiye BBC dukesha iyi nkuru ati: “Barimo kuturasaho kuva saa kumi n’imwe n’igice z’urukerera (5h30)”.
Magingo aya, Ingabo za Leta ntacyo ziravuga ku byatangajwe na M23 kuri iyo mirwano, BBC yagerageje kuvugana n’umuvugizi wazo, ariko ntibyashoboka.
Kuwa gatanu ushize, Umutwe wa M23 wasohoye itangazo uvuga ko “Ingabo za Leta n’abafatanya nazo barimo FDLR n’abandi” bitegura kubagabo ibitero bishya.
Bertrand Bisimwa umwe mu bakuriye umutwe wa M23 yatangaje kuri Twitter ko kuba “Ingabo za MONUSCO ziri muri iyi mirwano binyuranyije [n’ibyasabwe] n’Akanama k’Umutekano ka ONU”.
Mu cyumweru cya nyuma cy’ukwezi gushize, imirwano iheruka hafi y’Umujyi wa Goma yatumye abaturage hafi 100,000 bava mu byabo.
Iyi mirwano iravugwa mu gihe uyu munsi i Goma hateganyijwe inama y’abagaba b’Ingabo z’Ibihugu bigize umuryango w’Ibihugu bya Africa y’Iburasirazuba [EAC].
Abo basirikare bakuru baraterana bigendanye no gushyiraho umutwe w’Ingabo z’akarere wo kurwanya inyeshyamba zizanga gushyira intwaro hasi muri DR Congo.
Uyu ni umwe mu myanzuro yafashwe n’Abakuru b’Ibihugu bigize uyu Muryango bateraniye i Nairobi muri Kenya mu kwezi kwa Kane uyu mwaka.
