Umugaba Mukuru w’Ingabo z’u Rwanda zirwanira ku Butaka, Maj Gen Vincent Nyakarundi, yavuze ko umusirikare w’u Rwanda, RDF akwiye kugira ubuzima bwuzuye kugira ngo akorane n’abandi, anarinde Igihugu cye neza.
Ubu butumwa yabutanze ku basirikare babarizwa muri Brigade ya 503, kuri uyu wa Gatandatu tariki 06 Nzeri 2025, nyuma y’umwitozo wo kugenda n’amaguru bakora ibilometero 26 bakoze uhereye mu Kinigi, Akarere ka Musanze.
Uru rugendo rwatangiriye mu kigo cya gisirikare cya Kinigi, banyura mu Mudugudu w’icyitegererezo wa Kingi, bakomeza kaburimbo nshya inyura ku biro by’Umurenge wa Musanze, bakomereza ku Ishuri Rikuru ry’Ubumenyingiro rya INES Ruhengeri, nyuma basubira mu nzira banyuze, basoreza mu Kinigi.
Iyi myitozo yakozwe mu rwego rwo gukurikiza inama ziheruka gutangwa n’Umugaba w’Ikirenga w’Ingabo z’u Rwanda, Perezida Paul Kagame, ukunze gusaba ko abasirikare ba RDF bagomba guhora bitabira imyitozo ngororamubiri kubera ko ibafasha kugira ubuzima bwiza.
Tariki 25 Kanama 2025, ubwo Perezida wa Republika y’u Rwanda Paul Kagame, yaganirizaga abasirikare, abapolisi ndetse n’abacungagereza barenga 6000 barangije imyitozo bakoreraga mu kigo cya gisirikare cya Gabiro yabasabye guhora biteguye kandi umwanzi wagerageza guhungabanya umutekano w’Igihugu bakamurasa batajenjetse.
