Kuri uyu wa gatatu tariki 09 Gashyantare 2022, Urukiko Mpuzamahanga rw’Umuryango w’Abibumbye (ICJ) rwafashe icyemezo cy’uko Uganda igomba kwishyura Igihugu cya Repubulika Iharanira Demokarasi ya Congo akayaba ka Miliyoni 325 z’amadorari ya Amerika bitewe no kurenga ku mategeko mpuzamahanga byakozwe hagati y’umwaka wa 1998 na 2003 ubwo Ingabo za Uganda zinjiraga ku butaka bwa Congo.
Urukiko rwemeje ko ingabo za Uganda, UPDF zarenze ku mategeko mpuzamahanga zinjira ku butaka bwa Repubulika ya Demokarasi ya Kongo. Rwemeje ko kandi Ingabo za Uganda zashyigikiye imwe mu mitwe y’abarwanyi mu ntambara yabaye hagati ya 1998 na 2003 mu ntara ya Ituri iri mu burasirazuba bwa Congo.
Muri uru rubanza rwagejejwe bwa mbere mu rukiko rw’Umuryango w’Abibumbye rusumba izindi mu mwaka wa 1999, umucamanza yategetse ko Uganda igomba kwishyura izo ndishyi mu byiciro. Harimo miliyoni 225 z’amadorari ya Amerika z’indishyi zigenewe abafashwe ku ngufu, abana binjijwe mu gisirikare n’imiryango yapfushije ababo bagera ku 15.000. Urukiko rwagennye miliyoni 40 z’amadorari ya Amerika y’ibyangijwe n’intambara na miliyoni 60 z’amadorali ya Amerika y’umutungo kamere nka Diyama na Coltan rwemeza ko Uganda yacukuye mu Ntara ya Ituri.
Uru rukiko rwari rwasabye Ibihugu byombi ko byumvikana ku buryo bw’indishyi ariko Repubulika Iharanira Demokarasi ya Congo iza kugaruka mu 2015 ivuga ko ibiganiro byahagaze.
Icyemezo gifashwe n’uru rukiko rukemura impaka hagati y’Ibihugu ni ntakuka kuko nta rundi rwego rw’ubujurire rubaho nk’uko tubikesha Ijwi rya Amerika.
