Perezida wa Repubulika Iharanira Demokarasi ya Congo, Antoine Felix Tshisekedi, yagiriye urugendo mu Burundi aho yahuye na Perezida Evariste Ndayishimiye bagirana ibiganiro bifunze.
Mu itangazo ryashyizwe ku rubuga rwa X n’Ibiro bya Perezida Tshisekedi, ryavuze ko uru ruzinduko rwari rugamije gushimangira ubufatanye hagati ya Gitega na Kinshasa no kwiga ku bibazo bijyanye n’umutekano mu karere.
Tshisekedi yari avuye muri Congo Brazzaville aho yari yagiranye ibiganiro na Denis Sassou Nguesso mbere yo kwerekeza i Burundi.
Uru rugendo ruje nyuma y’uko ibiganiro ku mahoro byari biteganyijwe ku wa 15 Ukuboza 2024, i Luanda muri Angola, hagati ya Perezida Tshisekedi na Perezida Paul Kagame, byasubitswe.
Impamvu nyamukuru yatanzwe ni uko ubutegetsi bwa Kinshasa bwanze kwinjiza umutwe wa M23 mu biganiro, nk’uko Minisiteri y’Ububanyi n’Amahanga y’u Rwanda yabitangaje.
Bivugwa kandi ko Tshisekedi yaganiriye na mugenzi we w’i Burundi ku buryo ingabo z’u Burundi zafatanya na FARDC mu guhangana n’umutwe wa M23.
