Perezida Paul Biya wa Cameroun yongeye kugaragara mu ruhame bwa mbere nyuma y’ibyumweru bitandatu bishize hibazwa byinshi ku buzima bwe kubera kutagaragara.
Ukutagaragara mu ruhame kwa Perezida Biya w’imyaka 91 kwatumye haduka ibihuha bidafite ishingiro by’uko yaba atakiri muzima ariko bigahishwa nk’uko tubikesha BBC.
Kera kabaye kuri uyu wa Mbere, itariki 21 Ukwakira 2024 nyuma ya saa sita z’amanywa, televiziyo ya leta yagaragaje amashusho ya Paul Biya ageze ku kibuga cy’indege cyo mu murwa mukuru Yaoundé, mu rugendo rw’indege ivuye mu Busuwisi.
Guverinoma ya Cameroun yari yarabujije ibitangazamakuru kuvuga ku buzima bwa Biya umaze imyaka hafi 42 ku butegetsi ivuga ko ari ikibazo cy’umutekano w’igihugu.
