Urubyiruko ni imbaraga z’Igihugu kuko ari bo inkingi zose zihanze amaso ku hazaza h’iterambere bityo bakaba bagomba kurindwa ibiyobyabwenge aho biva bikagera ahubwo bagahanga amaso amahirwe abashyirirwaho ngo biteze imbere. Ibi bikaba ari nabyo Umuyobozi w’Akarere ka Nyabihu, madame Mukandayisenga Antoinette yagarutseho ubwo yari mu murenge wa Bigogwe kuri iki Cyumweru tariki 15 Kamena 2025 mu gikorwa cy’imikino y’ibigo by’amashuri mu karere ka Nyabihu na Rubavu cyiswe “Fair Play Tournament”.
Umuyobozi w’Akarere yibukije urubyiruko ko bafite impano nyinshi zabateza imbere aho kwishora mu biyobyabwenge dore ko ntawabyishoyemo ugira intumbero nzima y’ubuzima, anabizeza ko hagiye gushyirwa mo imbaraga hakongerwamo imikino mu buryo bwo kwegereza ingeri zose imikino.
Aganira n’ikinyamakuru WWW.AMIZERO.RW, Meya Antoinette yashimiye byimazeyo abategura iyi mikino aho GS Rega Catholic yo mu karere ka Nyabihu yegukanye igikombe itsinze GS Busasamana yo mu karere ka Rubavu ku bitego 3 ku busa. Saint Raphael yo muri Nyabihu nayo yatsinze GS Nyakiriba yo mu karere ka Rubavu igitego kimwe ku busa.
Chris Harrington ukomoka mu gihugu cya Canada, yahisemo gutera inkunga aya marushanwa nyuma yo gupfusha umwana we wakinaga umupira w’ amaguru, akaba yarabikoze nk’uburyo bwo kuzirikana no kwibuka uyu mwana we wishwe n’uburwayi ndetse no kugaragariza abantu kwicisha bugufi no kuzamura impano.
Abaturage nabo bishimiye iyi mikino kuko ngo ari kimwe mu bibereka ko bashoboye kandi bakagaragaza impano zabo ari nako irushaho kubahuza, bityo baboneraho no kwizeza ubuyobozi bw’Akarere ko buri wese agiye kuba ijisho rya mugenzi we bityo uruhare rwabo mu gukumira ibiyobyabwenge rukaba nyambere.
Umwe muri aba batsinze yagize ati: “Turishimye cyane gutwara iki gikombe nk’ikipe, ibi bitugaragarije ko dushyize hamwe twagera kuri byinshi no mu buzima busanzwe. Ku bw’ibi twabonye rero tuzakomeza gukora ibishoboka turushaho kwiteza imbere mu buzima bwacu bwa buri munsi.”
Imikino ni kimwe mu bihuza imbaga y’abantu bityo ikifashishwa mu gutambutsa ubutumwa ku ngeri zitandukanye kuko amarangamutima yabo aba yatwawe n’akanyamuneza gakomoka ku mikino maze kubaha ubutumwa bikaba nko korosora uwabyukaga kuko aba yageze mu yindi si.
Yanditswe na Lucky Desiré /WWW.AMIZERO.RW
