Abarwanyi b’Umutwe wa M23 batangije uburyo bushya bw’imirwanire batari bamenyerewemo, aho barimo gukoresha uburyo bwo gutega ibico (Ambush) bifashijije Pariki ya Virunga.
Amakuru aturuka i Kanombe, avuga ko kuva kuwa Kabiri tariki 09 Kanama 2022, abarwanyi bacye b’umutwe wa M23 batangiye gutega ibico (Ambush) ingabo n’abapolisi bahanganye banyuze muri Pariki ya Virunga. Ibi bico ngo batangiye kugaba bikekwa ko bifite intego yo gufunga umuhanda munini Goma-Rutshuru.
Hari andi makuru avuga ko abarwanyi benshi ba M23 bavuye mu bice bari basanzwe bagenzura bya Chanzu, Runyoni bakahasiga abasirikare bacye. Bivugwa ko abarwanyi b’uyu mutwe bavuye muri ibi bice berekeza mu gace ka Jomba, aho bikekwako bari gukorera ubucukuzi bw’amabuye y’agaciro agurishwa kugirango babone ibikoresho bigezweho bakoresha ku rugamba.
Kuwa Kabiri kandi, abarwanyi bacye ba M23 baturutse muri Pariki ya Virunga, bagabye igitero ku bapolisi bari bashyizwe mu gace ka Nyesisi kari mu ihuriro rya Gurupoma za Rugari na Gisigari. Muri iyi mirwano habaye kurasana mu gihe cy’amasaha ane, iza kurangira M23 yisubiriye aho yari iturutse mu ishyamba rya Virunga
Kugeza ubu, M23 yongeye umutekano mu bice bya Ruseke, Kabindi, Tchengerero na Gisigari nk’uko tubikesha Rwandatribune.
Abarwanyi benshi ba M23 bakomeje kugaragara mu gace ka Kanombe aho bari mu myitozo ikomeye bikekwa ko ibategurira kugaba igitero simusiga ku kigo cya Gisirikare cya Rumangabo kiri nko mu birometero 7 uvuye mu gace bashinzemo ibirindiro.
