Korali Abungeri ikorera umurimo w’Imana kuri ADEPR Kigasa, Paruwasi Nyarubara, Ururembo rwa Muhoza, bakomeje kwagura ivugabutumwa bakora ingendo mu ma Paruwasi atandukanye arimo no ku cyicaro cy’Ururembo rwa Muhoza, aho batumiwe na Korali Urukundo mu rwego rwo gukomeza kwamamaza Yesu bagamije gusubiza imbaraga imitima itakaje ibyiringiro.
Bamwe mu baririmbyi ba Korali Abungeri baganiye n’umunyamakuru wa Amizero.rw bemeza ko kuba Korali Urukundo yarabagiriye icyizere cyo kubana nayo mu ivugabutumwa mu giterane cyo kumurika umuzingo w’indimbo zabo, ari amahirwe kandi ko bahungukiye byinshi bizabafasha gukomeza kwamamaza ubutumwa bwiza mu ndirimbo.
Niyibizi Clémentine yagize ati: “Kuba twaje gufasha Korali Urukundo mu gushyira indirimbo zabo hanze ni umugisha kuri twe kandi hari n’icyo tuza kungukira muri iki gitaramo mu bijyanye n’ivugabutumwa kuko iyo Korali iteye imbere hari byinshi abandi bayigiraho”.
Bizimana Sammuel nawe yagize ati: “Tunejeje n’iri vugabutumwa twagiriye ku cyicaro cy’Ururembo rwa Muhoza kuko umirimo w’Imana ni mugari kandi buri wese agenda yigira kuri mugenzi we kuko nyuma yo kuvaha tugiye kubyaza umusaruro ibyo twungutse mu ivugabutumwa ryacu”.
Aba bose icyo bahurizaho ni uko cyari igitaramo giteguranye ubuhanga cyari kigizwe n’indirimbo zuzuye amavuta bifasha abitabiriye guhembukira muri Yesu Kristo Umwami w’abamwizera bose.
Nsanzimana Egide ni Umuyobozi wa Korali Abungeri. Avuga ko banejejwe n’ivugabubutumwa ryo ku rurembo. Ati: “Mu by’ukuri ni iby’igiciro cyinshi kuri Korali Abungeri mu kuza kwifatanya na Korali Urukundo mu gikorwa cyo kumurika indirimbo zabo kuko nk’uko dusanzwe tubigenza n’ahandi tugomba kubashyigikira kuko igikorwa cyabo twarakimenye kandi tukimenya kare, bituma rero twifatanya nabo kandi byagenze neza cyane”.
Korali Abungeri yatangiye umurimo w’Imana mu 1972, itangira ifite abaririmbyi 13 ubu ikaba igeze ku baririmbyi basaga 100 aho igenda ikora ibikorwa bitandukanye ibinyujije mu ivugabutumwa ahantu henshi hatandukanye nko gufasha abatishoboye ikaba ikomeje kwamamaza Yesu biciye mu ivugabutumwa mu ndirimbo.
