Ubunyamabanga bw’Umuryango w’Ibihugu bikoresha Icyongereza (Commonwealth), bubinyujije mu itangazo, buvuga ko Perezida w’u Rwanda, Paul Kagame n’Umunyamabanga Mukuru wa Commonwealth, Patricia Scotland, batangaje itariki nshya y’inama y’abakuru b’Ibihugu na Guverinoma, CHOGM.
Iri tangazo ryasohowe n’Ubunyamabanga bwa Commonwealth, rivuga ko itariki nshya yemeranyijwe n’Ibihugu bigize uyu muryango, ari tariki 20 Kamena uyu mwaka wa 2022.
Iyi nama izabera mu Rwanda, yari imaze gusubikwa inshuro ebyiri: Ubwa mbere yagombaga kuba muri Kamena 2020 iza gusubikwa kubera icyorezo cya Covid-19. Ubunyamabanga Bukuru bwa Commonwealth ku bufatanye n’abashinzwe gutegura iyi nama, bongeye guhitamo indi tariki, bemezako igomba kuba tariki 21 Kamena 2021, nabwo ariko yongera gusubikwa kubera ubwiyongere bwa Covid-19.
Umuryango uhuza Ibihugu bikoresha ururimi rw’icyongereza, Commonwealth, uhuza Ibihugu 54 n’abantu bagera kuri miliyari 2.4, muri abo 60% ni urubyiruko ruri munsi y’imyaka 30 y’amavuko.
Inama ya CHOGM ubusanzwe iba rimwe mu myaka 2, ikaba ari urwego rukomeye rugishwa inama rugahuza abafata ibyemezo kuri politiki zinyuranye.
Kuri iyi nshuro, igiye kuba nyuma y’imyaka 4 kuko yasubitswe kabiri bitewe na Covid-19. Ni ubwa mbere kandi muri myaka 10 iyi nama ya CHOGM igiye kubera muri Afurika.
