Kompanyi ikora ubwikorezi bwo mu kirere ya Kenya, Kenya Airways, ivuga ko yahagaritse ingendo zose zerekeza mu murwa mukuru wa Repubulika Iharanira Demokarasi ya Congo, Kinshasa kubera gufungwa “kunyuranyije n’amategeko” kw’abakozi bayo babiri ivuga ko bafunzwe n’ubutasi bwa gisirikare bw’icyo gihugu.
Mu itangazo yasohoye ku wa mbere tariki 29 Mata 2024 ku rubuga nkoranyambaga X, Kenya Airways ivuga ko idashoboye “gukora izi ngendo neza nta bakozi”, ikaba yemeje ko uku guhagarika ingendo gutangira kuri uyu wa kabiri tariki 30 Mata 2024.
Tariki ya 19 Mata 2024, abakozi babiri ba Kenya Airways bafunzwe n’urwego rw’ubutasi bwa gisirikare rwa DR Congo, ruzwi nka DEMIAP (Détection Militaire des Activités Anti-Patrie), kubera ikivugwa ko ari “ibura ry’ibyangombwa byo kuri gasutamo ku muzigo w’agaciro kenshi”, nkuko iyo kompanyi yabitangaje.
BBC dukesha iyi nkuru yanditseko umuyobozi nshingwabikorwa wa Kenya Airways yavuze ko “uwo muzigo uvugwa ntiwapakiwe cyangwa ngo wemerwe na Kenya Airways kubera ibyangombwa bituzuye”.
Muri uko gutabwa muri yombi, telefone z’abo bakozi babiri zarafatiriwe ndetse bangirwa ko hari uwabageraho kugeza ku itariki ya 23 Mata, ubwo noneho abategetsi bo muri ambasade ya Kenya i Kinshasa hamwe n’itsinda rya Kenya Airways bemererwaga kubasura.
Iyi kompanyi yo gutwara abagenzi mu ndege yashishikarije igisirikare cya DR Congo kurekura abo bakozi ba Kenya Airways bagasubira mu miryango yabo n’ubwo kugeza ubu Leta ya DR Congo nta cyo yari yatangaza kuri ibi.