Minsiteri y’Ubuzima mu Rwanda, MINISANTE yatangaje ko mu gihugu habonetse “abarwayi bake” bafite virus ya Marburg, kandi harimo gukorwa iperereza ngo hamenyekane aho yaturutse.
Itangazo rya Minisiteri y’Ubuzima rivuga ko hashyizweho ingamba zo kuyirinda no kuyikumira mu bitaro no mu bigo nderabuzima bitandukanye. Itangazo ntirivuga ibitaro cyangwa ikigo nderabuzima iyi ndwara yabonetsemo.
Iri tangazo rije rikurikiye amakuru atandukanye ku mbuga nkoranyambaga yavugaga ko hari abakora kwa muganga bamaze kwicwa n’iyi ndwara mu minsi micye ishize muri bimwe mu bitaro byo mu mujyi wa Kigali.
Minisiteri y’ubuzima ntiyavuze niba hari umuntu cyangwa abantu bari bicwa n’iyi ndwara ikunze gukanga abantu kugeza ubu, gusa isaba ko abantu bakitwararika cyane.
Iyi ni indwara yandurira mu gukora ku maraso n’amatembabuzi y’abantu bayirwaye, ibimenyetso byayo birimo kugira umuriro mwinshi, umutwe ukabije, kuruka, kuribwa mu mitsi cyangwa kuribwa mu nda n’ibindi.
Minsiteri y’ubuzima ivuga ko hatangiye igikorwa cyo gushakisha abantu bagiye bakoranaho n’ababonetseho iyi ndwara.
Virus ya Marburg ni iki?
Ni virus ijya gusa cyane na Ebola, nk’uko ishami rya ONU rishinzwe ubuzima ku Isi (OMS/WHO) ribivuga.
Virus ya Marburg yatangiye kuboneka igihe abantu 31 bayanduriye nyuma y’icyumweru bagapfa mu biza byayo byakurikiranye mu 1967 muri: Marburg na Frankfurt, mu Budagi na
Belgrade muri Serbia.
Iyi ndwara basanze yaraje iturutse mu nkende zinjijwe mu Budage zivuye muri Uganda. Ariko kuva icyo gihe iyi virus yagiye ica no mu zindi nyamaswa.
Ahabonetse virus ya Marburg ikomeye:
2017 – Uganda: abantu batatu nibo bayanduye, bose barapfuye.
2012 – Uganda: 15 barayanduye, bane barapfuye
2005 – Angola: 374 barayanduye, 329 barapfuye
1998-2000 – DR Congo: 154 baranduye, 128 barapfuye
1967 – Ubudage: 29 baranduye, barindwi barapfuye.
