Ikipe y’Ingabo z’Igihugu, APR FC ikomeje kwitegura umwaka utaha wa 2025-2026, mu mikino igomba gukina hiyongereyemo n’imikino ya CECAFA Kagame Cup. Iyi ni imikino yitabiriye n’umwaka ushize yitwara neza ariko amahirwe ntiyayisekera, itsindirwa ku mukino wa nyuma na Red Arrows yo muri Zambia kuri Penalite 10-9, Red Arrows yari yitabiriye nk’umutumirwa.
APR FC n’andi makipe abarizwa mu karere ka CECAFA, mu gice kigizwe n’Uburasirazuba bwa Afurika ndetse na Afurika yo hagati agomba gukina iri rushanwa hagati ya tariki ya 02 n’iya 15 i Dar es Salaam. Iri rushanwa kandi rigomba kuzakinwa n’amakipe 12 aturutse mu bihugu bitandukanye.
Impuzamahyirahamwe y’Umupira w’Amaguru muri Afurika y’Iburasirazuba no hagati, uyu munsi nibwo yashyize itangazo hanze imenyesha amakipe bireba ngo atangire kwitegura iri rushanwa. Kuri uyu wa kabiri tariki ya 05 Kanama 2025 nibwo Umuyobozi mukuru w’iyi mpuzamashyirahamwe Auka Gecheo yabitangaje.
Yagize ati: “Tunejejwe no gutangaza ko irushanwa rizaba muri Nzeri hagati ya tariki 02 na 15 i Dar es Salaam muri Tanzania. Twiteze ko iri rushanwa rizaba ririmo ihangana, amakipe akazarikoresha yitegura imikino nyafurika y’umwaka wa 2025-2026. Amakipe byitezwe ko agomba kwitabira arimo aya akurikira:
Vipers SC (Uganda), El Merriekh SC Bentiu (South Sudan), Mlandege SC (Zanzibar), Al Hilal (Sudan), Kenya Police FC (Kenya), Ethiopia Insurance (Ethiopia), MCC FC (Somalia), APR FC (Rwanda), Aigle Noir FC (Burundi), Young Africans SC, Simba SC (Tanzania), ASAS Djibouti Telecom (Djibouti).
APR FC ifite iki gikombe inshuro eshatu, mu nshuro zose iyi kipe imaze gutwara iri rushanwa yagiye iritwara ryabereye mu Rwanda. Icya mbere APR yagitwaye mu mwaka wa 2004 itsinze Ulinzi Stars yo muri Kenya ibitego 3-1. Mu mwaka 2007 nabwo baragitwaye batsinze Uganda Revenue Authority yo muri Uganda ibitego 2-1.
Iyi kipe y’Ingabo icyo iheruka yagitwaya mu mu 2010 itsinze St. George yo muri Ethiopia ibitego 2-0. Iyi kipe kandi ikina iri rushanwa, imaze gutsindirwa kuri finale inshuro 6. Uretse APR FC kandi andi makipe amaze gutwara iri rushanwa yo mu Rwanda, arimo Rayon Sports igifite mu 1998 na ATRACO yagitwaye mu 2009.
