Tunisia iheruka kwegukana igikombe cya Afrobasketball ya 2017 yabaye ikipe ya Gatanu imaze kugera i Kigali ahazabera iyi mikino ku nshuro ya 30, ikazitabirwa n’amakipe 16 yashyizwe mu matsinda 4.
Ikipe y’igihugu ya Tunisia y’abagabo bakina Basketball “The Eagles of Carthage” yageze mu Rwanda aho yaje guhatanira igikombe cya Afurika cy’ibihugu kizabera mu Rwanda kuva tariki 24 Kanama-5 Nzeri 2021.
Tunisia yabaye ikipe ya gatanu muri 16 azagera mu Rwanda nyuma ya South Sudan, Misiri, Uganda na Republique Centre Afrique.
Ikipe y’igihugu ya Tunisia iri mu itsinda rya kabiri (B), hamwe na Republique Centre Afrique, Egypt na Guinea. Ubwo iri rushanwa rizaba ritangiye kuwa kabiri tariki ya 24 Kanama, Tunisia ifite iki gikombe izacakirana na Guinea.
Tunisia izaba ikina inshuro iri rushanwa ku nshuro ya 23 ikaba igihugu kimaze kuritwara inshuro ebyiri (2011, 2017), yabaye iya kabiri mu 1965 mu gihe yasoje ku mwanya wa gatatu inshuro enye (1970, 1974, 2009, 2015).
Iyi kipe iri mu makipe 4 ahabwa amahirwe yo gutwara iki gikombe (cyo kimwe na Misiri, Senegal ndetse na Nigeria), ni imwe mu makipe afite abakinnyi beza kandi bafite inararibonye muri iki gikombe ndetse no mu makipe basanzwe bakinamo.
Aha twavuga abakinnyi nka Omar Abada, Ben Slimane na Ramdhouane Ben bigaragaje mu ikipe ya US Monastir yatwaye umwanya wa 2 mu mikino ya BAL.
Mu irushanwa riheruka, Tunisia yatwaye igikombe cya 2017 itsinze Nigeria amanota 77-65 ku mukino wa nyuma. Icyo gihe mu irushanwa ryakiriwe na Senegal yasoje ku mwanya wa gatatu itsinze Morocco amanota 73-62.
Angola ibitse ibikombe byinshi (11) ni imwe mu makipe atinyitse azaba ari mu irushanwa ry’uyu mwaka kuko inari mu itsinda rya mbere (A) kumwe n’u Rwanda, DR Congo na Cape Verde.
