Ihuriro ry’imiryango irenga 24 igizwe n’ibitangazamakuru n’amashyirahamwe aharanira uburenganzira bw’itangazamakuru, rirasaba leta ya Amerika kurengera Abanyafuganistani bakoreye itangazamakuru ry’amahanga. Iryo huriro riravuga ko kubera iyo mpamvu bashobora kwibasirwa n’Abatalibani bakomeje gufata ibice bitandukanye by’igihugu kuva Ingabo za Leta Zunze Ubumwe za Amerika zitangiye kuvayo.
Inzandiko iryo huriro ryandikiye Perezida Joe Biden, abayobozi b’abasenateri n’abadepite, zasabaga Leta zunze Ubumwe za Amerika gushyiraho gahunda ya visa ku banyamakuru bakoranye n’ibitangazamakuru byo muri Amerika. Izi nzandiko zavugaga ko benshi muri bo batinya ko Abatalibani bashobora kubagirira nabi kubera ko bakoranye n’itangazamakuru rya Amerika nk’uko byatangajwe n’Ijwi rya Amerika dukesha iyi nkuru.
Afuganistani imaze igihe ibarirwa mu bihugu bitoteza abanyamakuru ariko kuva aho hatangiriye imishyikirano hagati ya leta y’icyo gihugu n’Abatalibani, mu kwa cyenda 2020, n’aho ingabo za Amerika zitangiriye kuva muri icyo gihugu byarushijeho kuzamba. Abanyamakuru bagera ku 10 n’abakora mu itangazamakuru bamaze kwicwa kuva iyo mishyikirano yatangira. Abandi benshi bahunze uduce tw’amajyaruguru y’igihugu twigaruriwe n’Abatalibani.
Gusa kugeza ubu abategetsi ba Amerika birinze kuvuga niba baba barafashishije ingabo za leta ya Afuganistani zirwanira ku butaka ibikoresho bya gisirikare nk’ibisasu bya bombe n’ibindi mu rwego rwo kurinda ingabo za Amerika ubu zirimo ziva muri icyo gihugu.
