Guverinoma y’u Rwanda yasinyanye amasezerano y’ubufatanye mu by’ingendo zo mu kirere n’u Bwongereza ndetse na Panama, agamije koroshya ubwikorezi bw’abantu n’ibintu no kongera amahirwe y’ishoramari n’ubukerarugendo hagati y’ibi bihugu.
Iyi mikoranire mishya yemejwe mu Mujyi wa Punta Cana muri Repubulika y’Abadominikani, ahaberaga inama mpuzamahanga igamije guteza imbere serivisi z’indege za gisivili.
Ku ruhande rw’u Rwanda, amasezerano yasinywe na Ambasaderi Prosper Higiro uhagarariye u Rwanda muri Canada no muri Repubulika y’Abadominikani. Ku ruhande rw’u Bwongereza, yasinywe na Mark Bosly, ushinzwe ibiganiro muri serivisi z’ubwikorezi, naho ku ruhande rwa Panama, yasinywe na Marcos Castillo Masis, Umuyobozi w’Ikigo cy’igihugu gishinzwe indege za gisivili.
Ikigo cy’igihugu cy’indege za gisivili (RCAA) cyatangaje ko aya masezerano azwi nka BASA (Bilateral Air Services Agreement), azafasha guteza imbere ubucuruzi n’ubukungu bw’ibihugu byasinyanye, binyuze mu koroshya ingendo no gufungura amahirwe mashya y’ubufatanye mu by’indege.
