Perezida Samia Suluhu Hassan wa Tanzaniya na mugenzi we William Ruto wa Kenya, basinye amasezerano y’umuyoboro wa Gaze uzahuza ibi Bihugu byombi bihuriye mu Muryango wa Afurika y’Iburasirazuba, EAC.
Aba Baperezida ba Tanzaniya na Kenya bemeranyije ko bagomba gufatanya kubaka umuyoboro uzatwara umwuka wa gaze, ibi bikaba ari mu rwego rwo gutsimbataza ubuhahirane mu by’ubucuruzi no kugabanya igiciro cy’ingufu.
Gusinya aya masezerano byagezweho kuri uyu wa mbere tariki 10 Ukwakira 2022 mu biro bya Perezida, i Dar es Salaam, mu mubonano wahuje ba Perezida Samia Hassan wa Tanzaniya na William Ruto wa Kenya, ubwo Ruto wa Kenya yari mu rugendo rw’imisi ibiri arimo muri Tanzaniya.
Mu mwaka ushize, Perezida Hassan n’uwahoze ari perezida wa Kenya, Uhuru Kenyatta basinye amasezerano i Nairobi yari agamije gutangiza uwo mugambi, ariko kugeza ubu ibyo bikorwa ntibyari byatangira nk’uko tubikesha VOA.
Biteganyijwe ko uyu muyoboro uzubakwa ku burebure bw’ibirometero 600 hagati ya Dar es Salaam, Umurwa mukuru wa Tanzaniya na Mombasa muri Kenya. Ariko nta gihe cy’igihe ibikorwa bizaba byarangiye cyatangajwe.
