Umuryango w’Abibumbye (Loni) wasabye ibihugu biwugize kubahiriza inshingano zabyo zo kwishyura imisanzu ku gihe, uburira ko gukomeza kutubahiriza ayo masezerano bishobora gutuma ibikorwa byawo bihagarara bitewe n’ibibazo bikomeye by’amikoro.
Ibi byagarutsweho mu ibaruwa umunyabanga mukuru wa Loni, António Guterres, yoherereje ibihugu 193 bigize uyu muryango, agaragaza ko kudatanga imisanzu uko bikwiye biri gushyira Loni mu kaga k’imikorere yayo ya buri munsi.
Guterres yasobanuye ko Loni imaze igihe ihura n’ikibazo gikomeye cy’amafaranga, giterwa ahanini n’uko bamwe mu banyamuryango bayo batubahiriza igihe n’ingano y’imisanzu bagomba gutanga, bigatuma hari igihe uyu muryango usohora amafaranga utarakira.
Yagize ati: “Ibihugu byose bigomba kwishyura imisanzu yabyo ku gihe. Bitabaye ibyo, hakenewe impinduka mu mategeko zigamije kurinda Umuryango w’Abibumbye gusenyuka bitewe no kubura ubushobozi bw’amafaranga.”
Yongeyeho ko mu mwaka wa 2025, imisanzu yishyuwe yageze kuri 77%, mu gihe 23% byayo bitishyuwe, ibintu byarushijeho kuremerera imikorere ya Loni.
Uretse ibyo, Guterres yagaragaje ko mu mwaka wa 2026 honyine, Loni isabwa kwishyura miliyoni 227 z’Amadolari ya Amerika ajyanye n’imishinga itarakozwe, hashingiwe ku itegeko ry’uyu muryango risaba ko amafaranga yari yarateganyijwe imishinga itarashyirwa mu bikorwa asubizwa, bigatuma Loni itanga amafaranga itarigeze yakira.
Ibi bibazo by’amikoro byarushijeho gukomera bitewe n’uko Leta Zunze Ubumwe za Amerika zagabanyije cyane inkunga n’imikoranire byahoraga bigenera uyu muryango. Amerika yari umuterankunga mukuru wa Loni, aho nko mu 2022 yatanze inkunga ingana na miliyari 17 z’Amadolari ya Amerika mu bikorwa by’ubugiraneza.
Gusa mu ntangiriro za Mutarama 2026, Amerika yatangaje ko yikuye mu miryango myinshi irimo amashami 31 ya Loni. Perezida wa Amerika, Donald Trump, yasobanuye ko icyo cyemezo kigamije kugabanya ikoreshwa ry’imisoro y’abaturage ba Amerika mu gukemura ibibazo by’Isi, aho avuga ko hakwiye gushyirwa imbere gukemura ibibazo by’Abanyamerika ubwabo.
Iyi myanzuro n’ibihe bikomeye by’amikoro biri gushyira Umuryango w’Abibumbye mu bihe bitoroshye, bikaba bisaba ubufatanye n’ubwitange bw’ibihugu biwugize kugira ngo ukomeze gusohoza inshingano zawo ku rwego mpuzamahanga.
