Inama y’ubuyobozi y’urwego rw’u Rwanda rugenzura isoko ry’imari n’imigabane (CMA) yagize Karekezi Ngabonziza Eric umuyobozi mukuru w’agateganyo nk’inzira yo gukomeza guteza imbere uru rwego rufite uruhare mu iterambere ry’ubukungu bw’I gihugu.
Itangazo ryashyizwe hanze n’uru rwego, rivuga ko mu nshingano ze nk’umuyobozi mukuru w’agateganyo, Karekezi azayobora ikigo muri iki gihe cy’inzibacyuho, anashyira imbaraga mu gukomeza gushyira mu bikorwa ibyihutirwa bikubiye mu ntego z’igihe kirekire za CMA, hagamijwe guteza imbere isoko ry’imari n’imigabane rikorera mu mucyo.
Ni inshingano yinjiyemo asimbuye Thapelo Tsheole.
Umwaka wa 2025 warangiye Isoko ry’Imari n’Imigabane ry’u Rwanda rifite agaciro ka Miliyari 6.680 Frw. Aya mafaranga ni igiteranyo cy’agaciro k’ibiri kuri iri soko byose.
Agaciro k’imigabane yashyizwe kuri iri soko n’ibigo bitandukanye ni miliyari 4.700 Frw, mu gihe agaciro k’impapuro mpeshamwenda ko ari miliyari 1.900 Frw. Zigizwe ahanini n’impapuro mpeshamwenda za Guverinoma ndetse n’iz’ibigo binini.
Agaciro k’ibikorwa by’ubucuruzi (kugura no kugurisha) byakozwe kuri iri soko ry’imari n’imigabane ni miliyari 4.800 Frw. Muri ibi ibijyanye n’impapuro mpeshamwenda byari byihariye miliyari 181,8 Frw, mu gihe imigabane yo yari yihariye miliyari 6,7 Frw.
