Ishyaka riri ku butegetsi muri Uganda, NRM ryemeje Yoweli Kaguta Museveni, umaze imyaka 39 ku butegetsi muri Uganda nk’umukandida mu matora azaba mu mwaka utaha wa 2026, akazaba ahatanye kugira ngo ayobore manda ye ya munani.
Umuyobozi wa Komisiyo y’Amatora ya NRM, Dr. Tanga Odoi, yatangaje ko Perezida Museveni azafata impapuro zo kwiyamamaza ku wa Gatandatu tariki ya 28 Kamena 2025.
Kuri uyu wa Kabiri tariki 24 Kamena 2025, Dr. Tanga yabwiye itangazamakuru ko Museveni agomba gufata ifishi imwemerera guhagararira ishyaka NRM mu matora ataha ya Perezida wa Repubulika.
Yagize ati: “Nk’uko n’abandi bakandida babigenza, Perezida akaba n’Umuyobozi Mukuru wa NRM azaza gufata ifishi igaragaza ko aziyamamaza mu matora.”
Impapuro zo kwiyamamaza zizatangwa hagati ya tariki ya 26 Kamena n’iya 1 Nyakanga 2025, mu gihe urutonde ntakuka rw’abakandida bemejwe ruzatangazwa tariki 04 Nyakanga 2025.
Perezida Yoweli Kaguta Museveni w’imyaka 80 y’amavuko, amaze imyaka 39 ku butegetsi. Naramuka atsinze aya matora nk’uko ahabwa amahirwe menshi, azatangira manda ye ya munani.
Manda ye ya mbere yayitangiye mu 1986, iya kabiri mu 1996, iya gatatu mu 2001, iya kane mu 2006, iya gatanu mu 2011, iya gatandatu mu 2016, naho iya karindwi itangira mu 2021 ikazaeangira muri 2026 aho atsinze yatangira Iya munani yazasoza muri 2031.
