Umukandida w’Umuryango FPR-Inkotanyi ku mwanya w’Umukuru w’Igihugu akaba asanzwe ari na Perezida wa Repubulika, Paul Kagame yabwiye abanyamuryango b’Uturere twa Gicumbi, Rulindo, Burera n’abandi bari bateraniye i Gicumbi ko abashimira iterambere bamaze kwigezaho, avuga ko kuba yasanze ibyo basezeranye barabikoze, bishimangira ko ari intare kandi ko intare zihora ari intare zidashobora guhinduka ngo zibe impyisi.
Ubwo yari mu bikorwa byo kwiyamamaza kuri uyu wa Kabiri tariki 09 Nyakanga 2024, Umukandida w’Umuryango FPR-Inkotanyi, Paul Kagame, yashimye abanyamuryango bari bateraniye kuri Stade ya Gicumbi ko baje kumureba ngo baganire ari benshi, aberurira ko abizeye kuko ngo igihango bafitanye badateze kugitatira. Yabasabye gukomeza kurinda umutekano kuko iterambere ryose ari wo rishingiraho.
Mukarwego Alphonsine w’imyaka 58 akaba afite abana 10, yashimiye FPR-Inkotanyi ku isonga Paul Kagame wabazaniye ibyiza, kuri ubu ngo abanywaga kanyanga bakaba banywa amata. Ashimira Paul Kagame yagize ati: “Mwarakoze rwose kuko mwaturinze, twabanye mu rugamba rwo kubohora Igihugu kuko mwaduhungishije mukatujyana Gishambashayo. Najyaga ntekereza icyo nakitura FPR nkakibura ariko Nyakubahwa mu bana 10 batandatu nibo banjye abandi bane ni abo ndera mu rwego rwo kwitura ineza namwe mwatweretse ubwo mwabohoraga Igihugu”.
Shirimpumu Jean Claude uvuka mu murenge wa Shangasha akaba umuhinzi mworozi ukomeye, nawe yashimye Umuryango FPR-Inkotanyi, avuga ko ibi byiza byose babikesha umutekano bahawe n’Inkotanyi. Ati: “Turashima FPR-Inkotanyi yoroje abanya Gicumbi ubu Gicumbi turi ku isonga mu mukamo, nyuma yo kutugabira ubu batwujurije n’uruganda rwongerera agaciro umukamo, ku buryo tugiye gukirigita ifaranga. Turashima cyane kandi kaburimbo twahawe, kuri ubu ibirayi bivuye i Musanze bigera iburasirazuba bikiri bizima. Ibitoki bivuye iburasirazuba nabyo bigera mu majyaruguru bikiri bizima”.
Akarere ka Gicumbi umukandida w’Umuryango FPR-Inkotanyi yiyamamarijemo ni kamwe mu turere dutanu tugize Intara y’Amajyaruguru kakaba akarere gafite imishinga myinshi igateza imbere, ku isonga hakaza ‘Green Gicumbi’ abenshi birahira kuko yahinduye ubuzima bwabo ibibazo bagiraga bikaba amateka. Umuhanda Nyagatare-Gicumbi-Base nawo ukaba warahinduye byinshi mu buhahirane bw’abaturage ba Gicumbi ndetse unabahuza n’utundi turere nka Rulindo, Burera, Gakenke two mu majyaruguru ndetse na Nyagatare yo mu burasirazuba bw’u Rwanda.
