Leta ya Repubulika Iharanira Demokarasi ya Congo igaragaza ko iterwa impungenge zikomeye n’abantu bayinjiramo baturutse mu gihugu cya Afurika y’Epfo.
Ni ubutumwa bwanyujijwe ku rukuta rwa X, butanzwe na Ambasade ya Repubulika Iharanira Demokarasi ya Congo muri Afurika y’Epfo, aho ku ya 20/09/2024, yagaragaje ko “abinjira muri RDC bavuye mu gihugu cya Afurika y’Epfo, gushaka visa binyuze mu nzira zitemewe baba bashaka guhungabanya umutekano w’iki gihugu cye.”
Iyi ambasade yagize iti: “Leta ya Kinshasa ishaka kugarura umutekano mu gihugu hose, twamenye ko hari abafite umugambi mubisha wo guhungabanya umutekano binyuze mu gushaka visa, mu gihe kandi baba baciye inzira zitarizo. Abakora ibi, ahanini bava muri Afrika y’Epfo.” Iyi ambasade yanasabye Guverinoma ya Afrika y’Epfo gukangurira inzego z’iki gihugu zishinzwe abinjira n’abasohoka na sosiyete z’indege zikorera ingendo muri RDC zivuye muri Afrika y’Epfo, kuba maso zigakumira aba bantu.
Ibi bibaye mu gihe imirwano ikomeje gukara, hagati y’Ingabo za Leta ya Kinshasa n’umutwe wa M23 mu ntara ya Kivu y’Amajyaruguru ho mu Burasirazuba bwa Repubulika Iharanira Demokarasi ya Congo, ni nyuma yaho kandi mu mpera z’ukwezi kwa Gatanu uyu mwaka, umutwe witwaje imbunda wiyise Zaïre wari wagerageje guhirika ubutegetsi bwa perezida Félix Tshisekedi.
N’ubwo havugwa aba ariko umutekano wa RDC muri rusange, uhorana agatotsi haba i Kinshasa ku murwa mukuru w’iki gihugu no mu zindi ntara zigize igihugu cyose.
