Perezida Kagame yatangaje byinshi ku rugamba ruhenze RDF irimo mu gihgu cya Mozambique, ndetse anagaragaza gahunda y’ingabo z’igihugu ayoboye mu kurwanya inyeshamba zigaruriye zimwe mu ntara z’iki gihugu.
Mu kiganiro na RBA, Perezida Kagame yatangaje ko gutabara ari indangagaciro u Rwanda rugenderaho ndetse anavuga ko ntawukwiriye kwibaza impamvu u Rwanda rwatabaye ikindi gihugu kuko asanga byagakwiriye kugirwa umuco.
“Iyo umuturanyi ahiriye mu nzu, hakaba abaje gutabara, nta muntu wari ukwiriye kubyibazaho ngo anabaze impamvu hari abaje gutabara. Twohereje ingabo mu gihugu cya Mozambique ku busabe bwa ba nyiribwite. Turi muri kiriya gihugu ngo dutabare ba nyiracyo kandi twifuza kubikora uko babishaka.” Perezida Kagame aganira na RBA
Ku itariki ya 10 Nyakanga 2021 nibwo RDF yatangarije isi yose ko yohereje ingabo n’abapolisi bageze ku 1000 gufasha ingabo za Mozambique kwirukana inyeshyamba zigendera ku mahame y’idini ya Isilamu nyuma y’imyaka isaga 5 zigaruriye zimwe mu ntara z’iki gihugu.
“Perezida Nyusi yasabye ko twafasha igihugu cye kugarura intara zigaruriwe n’inyeshyamba. Twatangiriye ku ntara ya Cabo Delgado kandi igice kinini cy’iyi ntara cyamaze kubohozwa. Ingabo z’u Rwanda (RDF) na Polisi y’u Rwanda (RNP) zifatanije n’ingabo za kiriya gihugu zizakomeza kugaba ibitero bigamije kubohoza n’izindi ntara nyuma yo kubanza gushimangira umutekano usesuye w’aho izi ngabo zamaze kubohoza.” Perezida Kagame
Ubwo yari abajijwe ku bijyanye n’aho ubushobozi butangwa kuri iki gikorwa buva, umukuru w’igihugu yavuze ko byahenze u Rwanda ariko byari ngombwa gukorwa. Ati “Tumaze kwemeranya umugambi wo gutabara twiyemeje gutsimbura. Twabonaga bisaba ubushobozi bwihariye kandi buhambaye ariko dusanga ari ngombwa, ngirango minisitiri w’ubukungu arabizi kuko byabanje kutugora.”
Yakomeje agira ati “Ndongera kubishimangira hano imbere ya Camera, u Rwanda rurakoresha ubushobozi bwarwo, nta yindi nkunga iturutse aho ariho hose. Dufite ubushobozi butwemerera kubikora. Icyingenzi ni uko ikigenderewe [gutabara] gifite agaciro kurusha ibizatangwa kuri iki gikorwa.”
