Ikipe ya Rayon Sports yari imaze igihe itegura umukino wa gicuti n’ikipe ya Al Merrikh yo muri Sudan, wagombaga gukinwa kuri iki Cyumweru tariki 07 Nzeri 2025 saa moya z’umugoroba (19h00) kuri Kigali Pelé Stadium, wamaze gusubikwa ku busabe bw’umutoza Darko Novic utoza Al Merrikh nyuma yo gutandukana na APR FC.
Uyu mukino wari uwa nyuma ubanziriza umwaka w’imikino (pre-season) 2025-2026 kuri Rayon Sports, mbere yo gucakirana na Kiyovu Sports ku wa 13 Nzeri 2025 muri shampiyona. Iyi kipe ya Al Merrikh yari imaze iminsi mu Rwanda ihategurira umwaka w’imikino aho byari byitezwe ko iza no gukina n’ikipe ya Rayon Sports.
Ahagana saa moya z’umugoroba kuri uyu wa Gatandatu tariki 06 Nzeri 2025, ni bwo iyi kipe ibinyujije ku mbugankoranyambaga zayo, zirimo Facebook na Instagram, yatangaje ko uyu mukino batakiwukinnye kubera ubusabe bw’umutoza wabo Darko Novic.
Iyi kipe yanditse ubutumwa bugira buti: “Ku mwanzuro w’umutoza wacu w’unya-Serbia Darko Novic, umukino wa gicuti wagombaga kuduhuza na Rayon Sports wakuweho wimurirwa ku yindi tariki (itazwi).”
Rayon Sports ntirigera itangaza iby’aya makuru iyemeza cyangwa se iyahakana. Gusa amakuru AMIZERO.RW twamenye ni uko umwanzuro uza gufatwa mu masaha 22 uhereye igihe iyi kipe yasohoreye itangazo.
