Ikipe ya APR FC imaze igihe ishakisha itike yo kwerekeza mu mikino y’amatsinda nyafurika (CAF Champions League) bidakunda, n’ubu yamaze kumenya uwo bazahura mu ijonjora ry’ibanze mu mikino itaha. Ku rundi ruhande Rayon Sports itarakinnye imikino nyafurika umwaka ushize nayo yamaze kumenya iyo bazahura muri CAF Confederation.
Ikipe ya APR FC imaze imyaka ibiri yikurikiranya igarukira ku muryango w’amatsinda ya CAF Champions League, igasezererwa na Pyramid FC yo Misiri kandi inanyagiwe. Umwaka w’imikino wa 2023-2024 yasezerewe itsinzwe ibitego 6-1, naho uwaka ushize wa 2024-2025 bwo yagabanyije umwenda itsindwa 3-1.
Ikipe ya Rayon Sports iheruka mu matsinda ya CAF Confedration mu mwaka wa 2018-2019 yageze mu matsinda ya CAF Confederation Cup nyuma yo gusezerera Costa do Sol yo muri Mozambique ku mpuzandengo y’ibitego 3-2. Iyi kipe yanageze muri 1/4 iza gusezererwa na Enyimba iyitsinze ibitego 5-1.
Rayon Sports itaritabiriye imikino nyafurika umwaka ushize w’imikino, ubwo iherukayo mu mwaka 2023-2024 yasezerewe na Al Hilal Benghazi kuri penaliti 4-2, mu mikino yose yabereye hano mu Rwanda kuko mu gihugu cya Libya hari ibibazo by’ibiza.
Kuri uyu wa Gatandatu tariki 09 Kanama 2025 muri Studio za Azam TV ni bwo habaye tombora y’uko amakipe agomba guhura, haba mu mikino ya Champions League na Confedration. Ku ikubitiro saa sita z’i Kigali, amakipe azakina Confederation niyo yabanje gutombora, maze Rayon Sports yisanga igomba gukina na Singida United yo muri Tanzania.
Umukino ubanza uzabera kuri Stade Amahoro. Uwo kwishyura Rayon Sports igomba kuwukinira muri Tanzania. Ikipe izarokoka hagati y’izi izahura n’izava hagati ya Flambeau du Centre yo mu Burundi n’ikipe izahagararira Libya itaramenyekana.
Mu gihe Al-Ahli Tripoli ikinamo Djihad Bizimana na Manzi Thiery, yanganya umukino wayo ifitanye Al-Hilal ku munsi w’ejo tariki 10 Kanama, mu ya Kamarampaka iri kubera i Millan mu Butaliyani, niyo yazahura na Flambeau du Centre.
Ntibyatinze kuko nyuma y’isaha imwe hakurikiyeho tombora ya CAF Champions League, maze APR FC yisanga itomboye Pryramid FC ku nshuro ya gataytu yikurikiranya. Iyi kipe yo mu Misiri yari yasezereye APR mu cyiciro cya kabiri, niyo yatwaye igikombe umwaka ushize none ubu ho bagiye guhura ku Cyiciro cya mbere.
Nk’uko byagenze mu myaka ibiri itambutse ikipe ya APF FC niyo izbanza kwakira umukino wa mbere, hanyuma umukino wa kabiri ubere mu gihugu cya Misiri. ikipe izava hagati yazo izahura n’izaba yavuye hagati ya Ethiopian Insurance yo muri Ethiopia na Mlandege yo muri Zanzibar.
