Perezida wa Repubulika Paul Kagame yageze i Doha muri Qatar, aho azitabira Inama Mpuzamahanga yiga ku iterambere (World Summit for Social Development).
Perezida Kagame yageze i Doha kuri uyu wa Mbere tariki 03 Ugushyingo 2025. Ku Kibuga Mpuzamahanga cy’Indege cya Hamad yakiriwe n’Umuyobozi w’ishami rishinzwe protocole muri Minisiteri y’Ububanyi n’Amahanga ya Qatar, Yousif Fakhro, na Ambasaderi w’u Rwanda muri Qatar, Igor Marara Kayinamura.
Inama Perezida Paul Kagame yitabiriye iteganyijwe kuva kuri uyu wa Kabiri tariki 04 kugeza ku wa Kane tariki 06 Ugushyingo 2025.
Umwanzuro w’uko iyi nama izabera i Doha wafatiwe mu Nteko Rusange y’Umuryango w’Abibumbye. Intego yayo ikaba ukugabanya ibyuho biri mu iyubahirizwa ry’amasezerano ya Copenhagen ku bijyanye n’iterambere ry’imibereho myiza y’abaturage.
Mu Isi ihanganye n’izamuka ry’ubusumbane, impinduka zishingiye ku mibereho y’abaturage, iterambere ryihuse ry’ikoranabuhanga n’ihindagurika ry’ikirere, ikazaba urubuga rukomeye rwo kuganiriramo Ibibazo byugarije abatuye Isi, no gutahiriza umugozi umwe mu kubikemura.
Biteganyijwe ko iyi nama mpuzamahanga izitabirwa n’abakuru b’Ibihugu na za Guverinoma baturutse hirya no hino. (Igihe)
