Perezida Paul Kagame yongeye kuvuga ku iyobora rya Perezida Félix Antoine Tshisekedi Tshilombo wa Repubulika Iharanira Demokarasi ya Congo, ashimangira ko atigeze atsinda amatora, yaba ayo mu 2018 cyangwa ayo mu mwaka ushize.
Ibi Perezida Kagame yabigarutseho ku wa Kane tariki 16 Mutarama, mu musangiro wahuje we na Madamu Jeannette Kagame hamwe n’abadipolomate bahagarariye ibihugu byabo mu Rwanda.
Mu kiganiro cye, Perezida Kagame yagarutse ku mubano w’u Rwanda na Congo, ananenga ibihugu mpuzamahanga byakunze kunenga amatora yabaye mu Rwanda muri Nyakanga 2024, ariko bikirengagiza ibibazo byagaragaye mu matora yo muri Congo.
Yagize ati: “Umuntu uri guteza ibibazo mu mubano w’u Rwanda na Congo ntiyigeze atorwa. Murabizi neza, ariko ntimubivuga mu ruhame. Njye ndabivuga. Tshisekedi ntiyatsinze amatora inshuro ebyiri, kandi mwese murabizi.”
Perezida Kagame yanashimangiye ko ibi bihugu bidakoresha indangagaciro bihora byigisha, ahubwo bigakora ibitandukanye n’ibyo bivuga.
Yibukije ko ubwo Tshisekedi yatangazwaga ko yatsinze mu 2018, Martin Fayulu ari we wari watsinze amatora, nk’uko byagaragajwe na raporo zitandukanye. Nanone, mu matora ya 2024, Tshisekedi yongeye gutsinda mu buryo bunengwa, asiga Moïse Katumbi na Martin Fayulu.
Perezida Kagame yasoje asaba abadipolomate gushyira imbere ukuri no kwirinda gutanga amakuru abogamye, aho abenshi usanga bateza ibibazo mu karere.
