Ababyeyi n’abana babo bari berekeje ku ishuri bagonzwe n’imodoka yataye umuhanda abenshi barakomereka bikomeye. Byabereye hanze y’ikigo cy’ishuri ribanza mu majyepfo y’Intara ya Hunan mu Bushinwa.
Iyi mpanuka yafashwe nk’igitero, yabaye kuri uyu wa Kabiri tariki 19 Ugushyingo 2024, bikaba byakozwe n’imodoka yo mu bwoko bwa SUV y’umweru.
Ikimara kugonga aba bantu, umushoferi wari uyitwaye yahise afatwa na bamwe mu babyeyi n’abashinzwe umutekano kuri icyo kigo, ashyikirizwa Polisi.
Umubyeyi umwe wari ukiva kuri icyo kigo agejejeyo umwana we w’imyaka umunani uhiga, yavuze ko abantu benshi bakomeretse barimo n’abakomeretse bikomeye, ariko ko ku bw’amahirwe imbangukiragutabara yahise ihagera bakajyanwa kwa muganga.
Yagize ati “Ababyeyi batandatu cyangwa barindwi ni bo barwanyije bagatuma iyo modoka yagonganga abantu ihagarara. Umuzamu arashaje, afite nk’imyaka 70 cyangwa 80, nta byinshi yari gukora.”
Icyo kigo cy’ishuri cyabereyeho icyo gitero cyitwa Yong’an Primary School, giherereye mu Karere ka Dingcheng, mu Ntara ya Hunan.
Iki n’igitero cya gatatu nk’iki kibaye mu cyumweru kimwe mu Bushinwa, ibintu byatumye abaturage batangira kugira impungenge z’umutekano wabo.
Ku wa Gatandatu abantu umunani barishwe abandi 17 barakomereka batewe ibyuma mu kigo cy’ishuri ry’imyuga giherereye mu Burasirazuba bw’u Bushinwa. Polisi yavuze ko ukekwa ari umunyeshuri w’imyaka 21 wagombaga kurangiza amasomo uyu mwaka ariko akaba yaratsinzwe ikizami.
Mbere yaho, ku wa 12 Ugushyingo, abantu bagera kuri 35 baciwe mu gitero cy’imodoka mu Majyepfo y’u Bushinwa, aho umugabo yaroshye imodoka mu bantu barimo bakora siporo.
