Inama y’Abaminisitiri yateranye kuri uyu wa Gatanu tariki ya 30 Nyakanga yavuguruye amabwiriza ajyanye n’ingamba zo kwirinda ikwirakwira ry’icyorezo cya COVID-19.
Mu gihe benshi bari bategereje ibyemezo biri buve muri iyi nama y’Abamanisitiri cyane cyane ku bijyaye na gahunda ya Guma mu rugo, inama yanzuye ko guma mu rugo (lockdown) ikurwaho mu mu mujyi wa Kigali ndetse no mu turere twa Burera, Gicumbi, Kamonyi, Musanze, Nyagatare Rubavu, Rwamagana na Rutsiro.
Mu bindi, ingendo hagati y’umujyi wa Kigali n’Intara ndetse n’Uturere tw’Igihugu zasubukuwe uretse gusa ingendo ziva cyangwa zijya mu Mirenge yashyizwe muri gahunda ya Guma mu rugo.
Imodoka zitwara abagenzi zemerewe gukora ariko zigatwara gusa 50% y’abagenzi zisanzwe zitwara. Ni mu gihe inzu zicuruza amafunguro (Restaurants) nazo zemerewe gukora ariko uguze amafunguro akayajyana (Take away).
Mu gihe utubari n’insengero byo bikomeje gufungwa, ibikorwa by’ishyingirwa ryaba irikorewe imbere y’ubutegetsi cyangwa se mu nsengero biremewe ariko bkitabirwa n’abantu batarenze 10 kandi babanje kugaragaza ko bipimishije COVI-19 mbere y’amasaha 72.
Abaturage bose bongeye kwibutswa kandi ko ari ngombwa kubahiriza amabwiriza yo kwirinda COVID-19 harimo guhana intera hagati y’umuntu n’undi, kwambara neza agapfukamunwa ndetse no gukaraba neza intoki.
Aya mabwiriza mashya ajyanye no kwirinda akaba azatangira gushyirwa mu bikorwa guhera tariki ya 1 Kanama 2021, akazavugururwa tariki ya 15 Kanama 2021.
