Inyeshyamba za M23 zimaze iminsi mu mirwano n’ingabo za Leta ya DR Congo, FARDC, zatangaje ko zibaye zihagaritse imirwano.
Iri tangazo ryazo rivuga ko kuva kuwa gatanu tariki 01 Mata 2022, M23 irekuye ibice yari yarafashe igasubira mu birindiro byo kwirinda kugira ngo habe akarere kanini kabatandukanya n’ingabo za Leta mu kwirinda imirwano.
Abajijwe ibyo birindiro byabo, Major Willy Ngoma uvugira uyu mutwe yabwiye BBC dukesha iyi nkuru ati: “Turi ku misozi ya Tchanzu na Runyoni”, uduce bongeye kwigarurira muri iki cyumweru.
Ku ruhande rwazo, ingabo za Leta ya DRC zo zatangaje ko zashenye ibirindiro bikuru (Etat major) bya M23, ndetse abarebera hafi iby’izi nyeshyamba bakaba bemeza ko guhagarika imirwano atari impuhwe, ahubwo ko ari ubwoba bw’uko bashobora kongera kuraswa bikomeye nk’uko byagenze muri 2013.
Umuvugizi wa FARDC muri Kivu ya ruguru, Lt Col Ndjike Kaiko, yavuze ko ibyo birindiro byari hafi y’ikirunga cya Sabyinyo bakaba babishenye.
Imirwano yahereye mu rukerera rwo kuwa mbere yatumye abarenga ibihumbi 24 bava mu byabo mu duce tw’imirwano muri teritwari ya Rutchuru y’Intara ya Kivu ya ruguru, benshi bahungiye muri Uganda, nk’uko ONU ibivuga.
Iyi mirwano kandi yatumye hahanurwa kajugujugu ya UN yagenderaga mu gace k’imirwano, ipfiramo abasirikare umunani ba MONUSCO bo muri Pakistan, Uburusiya na Serbia.
Impande zombi zashinjanye kurasa iyi ndege, Umuryango w’Abibumbye ukaba utaratangaza amakuru arambuye ku ihanuka ryayo n’ubwo hari amakuru yavuze ko yaba ari impanuka isanzwe. Gusa ibi nabyo bishobora gutuma M23 iva mu mirwano nk’amayeri ariko bitavuzeko isaha ku isaha yagaruka.
Izi nyeshyamba ziyobowe na Gen Sultani Makenga zavuze ko zitangaje aka gahenge kugira ngo abategetsi bategure “ibiganiro mu mahoro byo gushaka umuti w’ikibazo kidutandukanya kimaze imyaka irenga 10”.
Mu gihe ihagaritse imirwano, M23 ivuga ko ifite “uburenganzira bwo kwitabara mu buryo bukomeye” mu gihe yakongera guterwa n’ingabo za Leta, FARDC.
Lt Col Ndjike Kaiko we avuga ko “FARDC itazemera na rimwe ko M23 igira ibirindiro ku butaka bwa Repubulika Iharanira Demokarasi ya Congo” kandi ko biteguye “gutera uyu mutwe bakawurandura”.
Buri ruhande rushinja urundi ko ari rwo rwatangije imirwano rutera ibirindiro by’urundi, ndetse hafi y’Umupaka wa Bunagana uhuza DR Congo na Uganda, bikaba byarabaye ngombwa ko Ingabo za Uganda, UPDF, zikozanyaho na M23 ziyishinja kurasa ku butaka bwayo.Ese
