Abahanga mu burezi bemezako ‘uburere buruta ubuvuke’, bakongera kwemezako ‘igiti kigororwa kikiri gito’, Igitabo Gitagatifu cya Bibiliya nacyo kigashimangira ko ‘nutoza umwana inzira nziza azarinda asaza atarayivamo’. Ibi byose ni byo Prof. Dr Rwigamba Balinda yakuye mu bitabo maze abyegereza abanyarwanda, abegereza ishuri rifasha ababyeyi, abana babo bagahora bishimye kubera ibyiza byuje umuco nyarwanda.
Iri shuri nta rindi, ni EPGI-ULK riherereye mu Karere ka Rubavu, Umurenge wa Gisenyi, Akagari ka Kivumu, mu nyubako za Kaminuza yigenga ya Kigali, ULK/Ishami rya Gisenyi. Abamaze kurimenya, bemezako nta gushidikanya ku rwego rw’uburezi ritanga kuko ngo uwarirereyeho adashobora gutekereza ahandi, ngo bikaba biterwa n’uburezi bufite ireme bahavoma, hakiyongeraho n’uburere udashobora gupfa kubona ahandi.
Mu kiganiro na WWW.AMIZERO.RW, Bigirimana Dusabe Theogene uyobora EPGI-ULK yavuze ko ibi byiza byose babikesha umurongo uhamye washyizweho n’uwashinze iri shuri, Prof. Dr Rwigamba Balinda uhora yifuza ko umwana w’u Rwanda ndetse n’undi wese ugana u Rwanda yahabwa uburezi buri ku rwego mpuzamahanga, akanafashwa kwigishwa indangagaciro z’umuco nyarwanda na kirazira zimwubakamo ubumuntu bumufasha guhora aharanira gukora icyiza, hakaniyongeraho gukorera hamwe nk’ikipe (Teamwork spirit).
EPGI-ULK ni kimwe mu ruhererekane rw’ibigo bya ULK Ltd birimo: ULK Kigali (main Campus), ULK Gisenyi, Glory Academy ifite amashuri yisumbuye, imyuga, abanza n’ay’inshuke. EPGI-ULK yatangiye mu kwezi kwa cumi 1994. Ni ishuri ryigisha rikurikije gahunda ya Leta (National Programm) mu rurimi rw’icyongereza n’igifaransa nk’indimi mpuzamahanga zikoreshwa henshi ku Isi. Abana biga mu mshuri y’inshuke biga mu gifaransa gusa, abiga mu mashuri abanza (P1-P6) bakiga mu Cyongereza, igifaransa bakacyiga nk’isomo ariko ryitabwaho cyane.
Mu ntero n’inyikirizo y’ababyeyi n’abarezi baharerera, bahuriza ku kuba barahisemo neza kuko ngo n’ubundi ikirima ari ikiri mu nda, kandi ngo burya akuzuye umutima gasesekara ku munwa. Ngo bitewe n’ubushobozi bw’iki kigo, buri wese akora atiganda kuko aba azi ko nawe ntacyo yahaburira, maze inyungu nyazo zikagera ku banyeshuri, ibintu bituma bahorana akanyamuneza, bigatera abayeyi kwibuka ko ‘kwibyara bitera ineza ababyeyi’ kandi ko kurerera kuri EPGI ari ukwiteganyiriza ugaca ukubiri n’umubabaro.
