Abaturage baturite Pariki y’igihugu mu turimo twa Kayonza, Gatsibo na Nyagatare bahawe amafaranga y’u Rwanda arenga miliyari 1 mu rwego rwo kubasangiza ku musaruro wayivuyemo mu mwaka w’ingengo y’imari wa 2025/2026.
Pariki y’Igihugu y’Akagera yinjije miliyari zisaga 6,7 Rwf mu mwaka wa 2024, ndetse imishinga itandukanye ikorerwa muri Pariki no mu nkengero zayo yafashije abaturage kubona imirimo n’amafaranga.
Amafi yasaruwe na Koperative zikorera mu bice bikora kuri Pariki yinjije miliyoni zisaga 172 Rwf, Koperative y’Abavumvu yinjiza hafi miliyoni 6 Rwf, iy’Abubatsi n’abakora nyakabyizi binjije hafi miliyoni 2 Rwf, naho ibyaguriwe abaturage binyuze mu guhaha byinjiza asaga miliyoni 7 Rwf.
Binyuze muri gahunda yo gusaranganya abaturage umusaruro uva mu bukerarugendo, iyo gahunda igamije gushora 10% by’agaciro k’amafaranga yinjijwe binyuze mu gusura ibyanya nyaburanga nka pariki, agashorwa mu mishinga irimo kubaka ibikorwa remezo nk’imihanda, ibigo nderabuzima, amashuri, gukwirakwiza amazi meza n’ibindi bizana impinduka mu buzima bw’abaturage.
Kuva iyo gahunda yatangira, Pariki y’Igihugu y’Akagera imaze gutanga akabakaba miliyari 7 Rwf, yakoreshejwe mu gushyigikira imishinga 250 y’abaturage mu Turere tuyegereye.
Ubuyobozi bwa Pariki y’Igihugu y’Akagera bugaragaza ko mu 2024, iyi Pariki yakiriye ba mukerarugendo 56 219 bavuye ku 54 141 basuye mu 2023.
Ikaba yarashinzwe mu mwaka wa 1934, aho ibarizwamo inyamaswa zirenga ibihumbi 11 zirimo inini zisurwa cyane ku Isi ari zo; Intare, Ingwe, Inzovu, Inkura n’Imbogo.
Habamo kandi inyamanswa z’amoko menshi zirimo Impala, Imparage, Isha, Udusumbashyamba, inyoni, imvubu, impyisi n’izindi zinogera ijisho ry’abayisura.
